MUHCS-ah ‘Give and Take’

Non-Government Hospital Association of Mizoram (NGHAM) chuan nimin khan thuchhuah siam in, Mizoram Universal Health Care Scheme (MUHCS) an la zawm ve loh chhan chu a kalphung a mumal tawk loh vang a ni, an ti a. Thuneitu hrang hrang nen vawi eng emawzat inbiakna an neih hnu pawha inremna a la awm thei lo chu pawi an tih thu an sawi a.
MUHCS chungchanga sawrkar leh NGHAM inrem theih loh chhan hi chanchinthar lamah puanzar a nih thin avangin kan tarlang tawh lo ang a. Kan thupui tur zawk chu ‘Give and Take” tih lam hi a ni.
Kan hria a, khawvel ram hrang hrangte pawh, an inkarah eng emaw inremlohna a awmin inremna siam turin an inbe thin. A tira an inrem loh chhan chu, an duh dan leh an ngaih dan a inan loh vang a ni thin. An duh dan leh an ngaihdan kha sawh sawn duh tlat lo ve ve se, inremna a awm ngai lovang; mahse, ‘an inbe rem thei ta’ tih a nih hian, a tu ve ve pawhin a tira an tanchhan kha tlemin an her rem ve ve a, chumi hnua inrem thei chauh chu an ni thin. He inremna hi ‘Give and Take’ avang chauha lo awm thei a ni.
Ramri chungchangah pawh hian a chiang khawp mai. Assam sawrkar nena kan ramri hi tun thlengin sawi fel a la ni lo a, a chhan pawh kan tanfung ve ve kan sahuai thing vawn tlut vang a ni mai. Keini lamin kan pi Ieh pute lo luah chin ram (1875) kan tlawhchhan a, Assam lamin tuna kan ram luah chin leilung ngei ngei pawh rawn dai lutin ‘kan ram chin asin’ an tih avangin silai te a ri a, nunna hialin a tuar tawh a. Hei hi a chhan pakhat chu, “Give and Take” system kan hman theih loh vang a ni ber awm e. Meghalaya leh Assam pawhin ramri buai an nei; keini ang thovin an buai ve a ni. Mahse, hmun tam takah chuan he “Give and Take” system hmang hian an inrem tawh.
Chutiang chu a ni mai; MUHCS chungchangah pawh hian, tun thlenga inremna a la awm theih loh chhan chu ‘tawlhsawn duh lohna’ vang a ni ber awm e. Donald Trump-a’n ‘tariff war’ a rawn puang a, a elpui ber China nen an thu a inbat fuh thei lova, mahse an inbia a, an inrem leh ta mai. A chhan chu an tawlh ve ve tlat alawm.
Sawrkar leh NGHAM hian mipui hamthatna an duhpui ve ve rualin, an dinhmun sawh nghehna tur an ngaihtuah ve ve a tul a, an thiamawm ve ve. Pakhat a thiam a, pakhat a dik, tih ang deuh khan.
Chuvangin, mipui duhsaktu ve ve an ni bawk a, mahni duh dan leh ngaih dan sahuai thing vawn tlut lovin, ‘nangni chuti chin chu tawlh ula, keini heti chin hi kan tawlh ve ang a…’ ti ve ve thei se. Chuti a nih loha inhriatthiamna (mutual concessions and compromises) a awm theih loh chuan, mipui harsatna thlentu an ni ve ve reng dawn tihna a ni mai.