Myanmar-a sipai lal thahnaah naupang kum ruk mi man tel

Myanmar-a sipai lal thahnaah naupang kum ruk mi man tel
Myanmar-a venhim hna thawktute chuan hmeichhe naupang kum ruk leh mi dang 15 chu thla hmasaa army officer chawl tawh thah kaihhnawihah an man tih sorkar chanchinbuin a tar lang.
Mi 16 zinga 13 hi mipa niin hmeichhe pathum nen an ni a. Thla hmasa tawp lama region palia an man niin sorkar enkawl Global New Light of Myanmar chuan Zirtawpni khan a puang.
An mi man zingah hian an mi man zinga tel, Myo Ko Ko-a fanu, Lin Latt Shwe pawh a tel a. Chanchinbu chuan an ram lailia Bagan khawpuiah a nu leh pate nen man an ni tih an tar lang.
Hel pawl hriat lar lem loh tak, Golden Valley Warriors inti chuan an ram sumdawnna khawpui, Yangon-a May 22-a a chenna in bula kum 68 mi, Brigadier General Cho Tun Aung thattuah an inchhal.
Mi man zingah hian mi mal damdawi in neitu, mi thattua puh mante hliam enkawltu nia sawi pawh a tel.
Chanchinbu dang, The Irrawaddy chuan Golden Valley Warriors hian mi 16 mante hi sipai lal thahnaah an inhnamhnawih lo tih an sawi niin a tar lang.
Cambodia-a an ram palai pawh lo ni tawh, Cho Tun Aung-a thah a ni hi kum 2021-a mipui thlan, Aung San Suu Kyi-i sorkar paih thlaa sipai rorelna a din hnua sipai rorelna thlawptu langsar thah thar ber a ni.
Sipai sorkar a dina anmahni duh lotuten an beih let hnu, tual chhung indona nasa tak Myanmar-a a chhuah hnuah hian sipai hotu lawk leh chawl tawh eng emaw zat bitum an ni a. Anni bakah hian sorkar hna thawk lian, tual chhung hotu leh sumdawng thlengin, sipai sorkar hnimhnai deuh nia hriat chu thah an ni tawh thin.
Golden Valley Warriors chuan an thah hnu lawkah khan Facebook-ah thuchhuah siamin Cho Tun Aung-a kha Myanmar-a National Defence College-a ram himna leh firfiak beihna zirtirtu a nih thu leh a zirtirna avang hian tual chhung indona kal mekah sipaiin mi an suatna intanna niin an sawi a ni.