Myanmar atanga raltlan 36,000 chuang awm mek

Tun hnai kum li vel chhungin Mizoramah raltlan an lut deuh reng a, tun hnaiah a hlawmin Myanmar atangin an lut leh bawk. Myanmar atanga Mizorama raltlan awm mekte hi mi 36,663 tia chhinchhiah an ni.

Kar hmasa leh tun kar tir lamah Champhai District dep Myanmar lam an buai a, an buaina avanga tlanchhia Mizorama lutte hi mi 4,244 tiin Mizoram Police te’n an chhinchhiah. Police te chhinchhiah danin, a hmain raltlan 32,419 Mizoramah an lo awm sa bawk.
2021 February-ah Myanmar an buai a, sipaiin sorkarna an la a, chumi paih tum chuan mipuiin ralthuam an lek a, sorkar sipai leh mipui sipai an indo avangin 2021 hnu-ah hian Myanmar atangin Mizoramah mi engemaw zat an raltlan a ni.
Myanmar atanga raltlante hi Zo hnahthlak deuh vek an ni a, hnam dang tlem azawng an awm. Mizorama raltlan awm mekah a tam ber chu Myanmar atanga rawn lut an ni. Myanmar-a rorel khawla tel, MP leh MLA te pawh an tel a, Kawl te pawh an awm.
Myanmar atanga Mizorama raltlante hi an che sawn deuh reng a, mahni khuaa kir leh an awm bakah Mizoram leh mahni khaw kartawn deuh reng an awm bawk.
Myanmar bakah Bangladesh leh Manipur atangin Mizoramah Zo hnahthlak engemaw zat an raltlan bawk a, a tam ber chu Myanmar atanga raltlan an ni.