Myanmar atangin mi 33000 chuang raltlan tawh

2001 February ni 1-ah Myanmar-ah sipaiin sorkarna an la a, chumi hnuah Mizoram leh ram hrang hrangah Myanmar atangin mi engemaw zat an raltlan tawh. Mizoramah chuan mi 33657 an raltlan tawh tia chhinchhiah a ni.Raltlante hi Mizoram chhunga an insawn fo bakah an khua a ralmuan deuh chuan an kir a, chuta tangin Mizoramah an let leh thin. Chuvangin raltlan lut tawh zawng zawng pawh hi Mizorama awm mek zat chu a ni lo tih thu dawn a ni. July ni 22-a Mizorama awm zat report chu 31428 a ni a, raltlan lut chhinchhiah zat aiin a tlem.
Mizoram sorkarin a chhinchhiah danin, Myanmar atanga raltlan lut tawh zawng zawng mi 33657 zinga mi 30653 chu an nihna chipchiar zawka chhinchhiah felin ID card pek an ni tawh. Mahse sorkar laipui thu angin raltlante hi uluk zawka chhinchhiah tum an ni a, biometric details lak tur niin, an kutzungpui pahnih leh an kutzungtang dang pali-a an kutzia lak tur a ni.
Mizoram sorkarin a chhinchhiah danin, Myanmar atanga Mizorama tlanchhiate zingah hian mi 1257-in Covid-19 hri an kai a, vanduaithlak takin an zinga mi parukin nunna an chan tawh. Raltlante hi hri danna pawh pek thin an ni.
Kuminah Myanmar atangin raltlan hi a hma angin an pung tawh lo a, kum tira Myanmar sorkar sipaite’n thlawhna hmanga Camp Victoria an beih avanga a hlawma Mizorama tlanchhia an awm hnua a hlawm lian thama tlanluh a awm zui rih lo tih thu dawn a ni.
Tun hnaiah Myanmar hmun thenkhat chu a hma aiin a ralmuang deuh a, hei vang hian mahni khuaa kir pawh an awm zeuh zeuh reng tih thu dawn a ni a, an zingah Mizorama let lova mahni khuaa awm nghet te pawh an awm tih thu dawn a ni bawk.