Myanmar raltlan sing 2.6 chhinchhiah tawh

Myanmar raltlan sing 2.6 chhinchhiah tawh
Mizoram sawrkar chuan Myanmar raltlan zingah mi 26381 chu India sawrkar phut angin a chhinchhiah tawh.
Assembly Session-a zawhna chhangin Home minister K Sapdanga chuan, Mizoram-a raltlante biometric enrolment neih mek a ni a. 2026 February 5 thleng khan Myanmar raltlan 26381 chhinchhiah an ni tawh a; mi 1974 chhinchhiah zawh loh, hmabak an la awm tih a sawi.
Bangladesh raltlan awm zat chu chhinchhiah thin ni mah se, a karleh lawkah danglamin a kiam leh duak thin a, lut ru leh man an awm reng a, tunlaiin an veh leh mek tih a sawi. An chhinchhiah hnuhnung berah mi 1630 vel nia hriat a ni a, record thar ber neih tumin an lo enzui tur thu a sawi.
Zawhna chhangin Home minister chuan, Myanmar raltlante an duh duhna hmuna awm phalsak an ni hranpa loa, sawrkar duhna hmunah an awm vek thei loa, an duhna hmunah an awm thei bik loa; school, an chhungte in leh hmun hrang hrangah an awm darh a, sawrkarin an awmna hmun atana ruahman chu nei thin bawk mah se, a ruahmantu leh a raltlanate tan pawh a tih theih tak tak thin loh tih a sawi a ni.
Raltlan zingah sumdawng an awm tih sawrkarin a hriatpui loa, thil tih chi loh, khap a ni tih a sawi. Chutihlaiin a ruka sumdawng deuh noh noh sawi awm chu an inchhui zel a, an hriat theih chin khapin man tur awm chi an man a, an thil tawlh vel azirin thubuai rip tak tak awrh tir pawh an awm tih a sawi.