Myanmar tuilianah mi 200 chuangin nunna chan tawh

Myanmar sorkar na chelh mektute chuan an ram chuan Typhoon Yagi an tawrh nasat thu sawiin, mi 220 chuangin nunna an chan tawh niin an sawi a, mi 80 chuang zawn mek an nih thu an sawi bawk.
Myanmar hian he thlichhia hi an tuar nasa hle a, a bikin Vietnam, Laos leh Thailand hnaih lam ramte nen an tawrh nasat thu an sawi.
UN chuan he an chhiatna tawrhah hian nasa taka tanpuina leh chetlak hna an thawhpui nghal a, tui thianghlim in tur bakah silhfen leh chen lailawkna tur thlengin a ngaihtuahpui nghal bawk.
Tuilian nasa tak a thlen chhoh zel avang hian inralrinna dar an vaw mek zel bawk a, a tuar nasatute hi khawsak harsa zualte an nih zel bawk avangin chet lak mai bakah a hnu lama enkawl zelna a hautak hle nia sawi a ni.
UN thuchhuahin a tarlan danin, inbiakpawhna leh inkalpawhna kawngah harsatna nasa tak a thlen tak avangin mipui nuai 6 chuang zette chu dinhmun hlauhawm takah an ding mek a, inkalpawhna kawng a chhiat bakah chhanchhuahna kawngah volunteer te chet lak a harsa hle bawk a, hei vang hian theih ang anga chetlak a tul thu leh tuilian kara a theih ang anga chhanchhuah hna thawh thuai thuai a tul thu an sawi.