MZU-a awm Meitei chet danah zirlai pawl lawm lo

Mizoram University chhunga Meitei community-te chet danah Mizo zirlai pawl pahnih chuan an lawm loh thu sawiin, hma la turin university thuneitute an ngen.
Hemi chungchanga thudawn danin, Mizoram University-a Ph.D tilai Meitei pakhat chu video viral-ah Manipura chi leh chi buainaa Meitei lam hma la tu zing ami ‘Arambai Tengol’ tana sum khawn bakah amah chu sum khawn hlantu ah a tang niin a lang a ni.
MSU Gen. Hqrs hruaitute chuan Thawhtanni khan MZU registrar hnenah lungawilohna lehkha an thehlut a. Hun rei tak ata tawh Mizorama hnamdang zirlai awmte himna turin theihtawp an lo chhuah tawh thin a. Manipur buaina avanga hlauhlawpa Meitei zirlaite an tlanchhiat lai pawhin a hnemtu ah tang hram hramin, Zofa unaute laka an chet duh dan avanga thinrim taka an awm lai pawhin state ralmuang ber kan nihna chhawmnung turin an insum hram hram tih an sawi.
Hetihlai hian tunhnaiah MZU-a Meitei zirlaiten Zofa unaute tih chimihna tur hmanraw lei nan sum an lo khawn tih sawiin, ‘Ralmuang taka kan dah laiin, hnunglam atanga min vit let hi MSU chuan a ngaithiam lo takzet a. MSU hi zirlai pawl a nih angin kan ram leh hnam chhan nan chuan a tawp a thleng zel thin a. Tuna kan zirlaipui ngeiin kan unaute chimihna atan tha an thawhnaah hian tui aiin thisen buk a rit zawk tih hre turin Mizo zirlaite MSU chuan a chah nawn a, he thil thleng hi kan enliam mai mai dawn lo a ni,’ a ti.
MZP Gen. Hqrs. hruaitute pawhin MZU registrar bakah Dean Students’ Welfare hmuin, Meitei hel – Arambai Tengol hnena silaimu man tur khawna hlantu MZU hnuaia Ph.D tilai Teresa Nungthujam chu zirna a chhunzawm theih tawh lohna tura hma la turin a ngen. ‘Huangtau taka Mizorama zirlai ni mek Meitei nula-in Meitei hel tana donation a lo khawn hi pawi kan tiin kan ngai thutak hle a, mithiam, zirna sanga zir mekin hnam leh hnam inkara buaina tichhuak a, tipunlun thei tur zawnga hma a la hi pawm thiam har kan ti a, MZU hnuaiah zirna a chhunzawm theih tawh loh ngei nan hma lak chhunzawm zel kan tum a ni,’ a ti.