MZU-ah tualto thil tharchhuah siam dan leh vawnthat dan zirtir

MZU-ah tualto thil tharchhuah siam dan leh vawnthat dan zirtir
Mizoram University Department of Botany leh ICAR-National Institute for plant Biotechnology (ICAR- NIPB) tangdun chuan Thawhtanni khan MZU hmunah tlangram kuthnathawktute leh thil siamchhuah lam tuimite tan, ramngaw atanga kan hmuh theih chi hrang hrang siam leh vawnthat dan inzirtirna an buatsaih.
Hmanpuitu MZU vice chancellor Prof. DC Deka chuan, Mizoram chu lehkha thiam tamna state a nih angin, kan ramin ei tur kan tharte hlawk lehzuala siam chhuak a, ram pawn thlenga thawnchhuah theiha buatsaih a tul tih a sawi.
Hmanpuitu dang Agriculture and Farmers’ Welfare additional director B Ramnunsanga chuan, kan thlai thar leh ram lama chawhmeh kan lak thin chu eizawnna ngelnghet tak ni thei khawpa kan siamchhuah a pawimawh tih a sawi a. Mizoram chu leilung hausakna nei tha a ni a, heng hi tangkai lehzuala kan hman a paiwmawh tih a sawi a ni.
Program coordinator Prof. Awadhesh Kumar chuan sawrkar laipui project leh MZU Department of Botany tangdun chuan kuthnathawktute hmakhua ngai chunga he hun hi buatsaih an ni tih a sawi a. Mizorama kuthnathawktuten an thil tharte hlawk lehzuala an buatsaihna kawngah puih an ngaihna zawnah ICAR-NIPB chuan puih a inhuam reng tih a sawi.
Organic food consultant leh integrated agriculturist Hitoshi Yokota chu resource person niin, Mizorama kan thei thar tam pawl lakhuithei atanga theitui siam dan leh vawnthat dan a zirtir a. Mizoram-a pickle siam lama hmingthangten pickle chi hrang hrang siam dan leh vawnthat dan an zirtir bawk.
Aizawl district leh a chhehvel hmun hmun hrang hrang atangin hetiang lama tui mi 200 vel an tel a ni.