N. Ireland beiseina a tawp

September 7, Ninga zan khan Euro 2024 khel tur zawnna khelh chhunzawm a ni a. Slovenia lakah 4-2 ngawta an tlawm vangin Nothern Ireland beiseina zawng zawng a tawp a, European championship-ah an inlan phak dawn lo tih tihchianin a zawm zui nghal. Group H ah Finland an khel tha chhunzawm a, Kazakhstan hnehin group hmahruaitu an ni chhunzawm zel.
Euro 2024-ah inlan phak beisei zui thei tura chak mamawh Nothern Ireland hian Stadion Stozice-ah Slovenia an luhkhung a, Mimualah goal hnih thun ve bawk mah se tlawm zawkah an tang a, beisei tur an nei tawh lo. N. Ireland lakah hian Slovenia in bul an tan tha viau a, inkhel tan atanga minute thumna lekah Andraz Sporar hmangin hmahruaina goal an thun nghal.
Hma takah goal chhuah mah se Ireland an insiamtha thuai a, minute 7-naa Isaac Price goal thun hmangin an si phurh an sut. 1-1 a nih hnuin Slovenia in goal thun belh tumin thapui an thawh zui chiam a, an hlawhtling leh thuai. Minute 17-naah Jonny Evans chuan an lamah a ti-goal a, Slovenia in hma an hruai let leh nghal. Evans goal thun bakah hian minute 42-naah Benjamin Sesko chuan an goal thumna a thun zui leh a, 3-1 a hmahruai chungin chawlhlawk an hmang.
Chawlhlawk hnu lamah N. Ireland in bul an tan tha ve leh a, minute 53-naah Jonny Evans chuan a chet sual tawhna siamthain goal a thun a, an si phurh a sut then. Evans goal thun atanga minute thum hnu lekah Andraz Sporar chuan Slovenia goal lina a thun zui ve leh thung. Goal ruk a luh hnu hian goal dang a luh belh tawh lova, Slovenia chuan 4-2 a hnehna changin, point thum an hmu zui ta a ni.
Slovenia lakah chak mamawh tak chunga an tlawm leh tak vangin Nothern Ireland hian khelh nga atangin point thum chauh an hmu a, group H atangin pahnihna tak ngial pawh an beisei phak tawh lo. Nothern Ireland an tlak chian lai hian Slovenia erawh chuan khelh nga atangin point 10 an hmu a, Euro 2024 khel phak turin beiseina sang tak an nei zui zel.
Finland an kal zel
Euro 2024 khel tur zawnnah rin lawk aia thain Finland an khel tha a, group H-ah hmahruaitu an ni chhunzawm zel. Hmahruaitu Finland hian ninga zan kha Mimualah Kazakhstan an hmachhawn a, minute 78-naa Oliver Antman goal thun hmangin hnehna pawimawh an chang. Kazakhstan lakah hnehna an chan leh tak vangin Finland hian khelh nga atangin point 12 an hmu a, point hnihin hma an hruai fal mek. An hnuaia awm Denmark leh Slovenia ten point 10 ve ve an hmu mek thung a, an inkar a zau lo viau thung.
Ninga zana inkhel dangah Group H-a team ngaihven Denmark chuan Parken, Copenhagen-a an mikhual San Marino chu si li faiin an hneh a, awlsam takin point thum an hmu. Denmark tan hian Pierre-Emile Højbjerg, Joakim Maehle, Jonas Wind leh Yussuf Poulsen ten goal khat theuh an thun. Denmark lakah an tlawm leh tak vangin San Marino hian khelh nga atangin point an la hmu lova, table mawngphah an luah nghet.