NAAC team-in HBC endik

India rama college leh university endiktu, National Assessment and Accreditation Council (NAAC) chuan April 3 & 4 khan Govt. Hrangbana College an endik a. India ram hmun hrang hrang atanga professor rual telna Peer Team-in an endik a ni.
Nilaini khan nilengin college an endik a. Tlai lamah alumni leh zirlai nu leh pate nena an inkawm a; Hrangbana College Alumni zinga tuna state sawrkar nihna chelh mek, Assembly speaker Lalbiakzama, minister Dr Vanlalthlana leh B Lalchhanzova bakah MLA Lt.Col. Clement Lalhmingthanga, Hrangbana College principal hmasa ber Dr. Kenneth Chawngliana leh Alumni hruaituten an hmanpui a, zan lamah college Golden Hall-ah Cultural Night hman a ni.
Peer Team member-te hian college zirlaite talent neih that zia bakah zirlai leh zirtirtute inkara inlaichinna leh inpawhna that zia fakawm an tih thu an sawi a. Zirlaiten an kutchhuak chi hrang hrang endik tura an lo pho chhuah chu hmuhnawm an tiin, ropui an tih thu an sawi.
Ningani khan Durtlang leh Muthi-a he college-a lut zirlai, mipa leh hmeichhe hostel bakah college hmunhma endik lehin, tlailamah Exit Meeting an hmang a ni.
Tun tum hi, Mizoram sawrkar enkawl college zinga NAAC ‘A’ grade nei hmasa ber, Hrangbana College-in NAAC assessment vawi 4 a hmachhawnna a ni a, kum 2018 khan a vawi thumna hmachhawnin B++ grade pek an lo ni tawh a ni.