National Handloom Day hmang

Sawrkar laipui Ministry of Textiles ruahman angin Thawhtanni khan ram pumah National Handloom Day hman a ni a. Mizoramah pawh he ni hi hman niin, Aizawlah chuan Sericulture minister Lalrinawma hoin hman a ni.
Minister chuan 1905 August 7-a ‘Swadeshi Movement’ kalpui tan hriatrengna’n National Handloom Day buatsaih a ni chu, ram pawnlama innghat loa mahni kutchhuak ngei hmanga intodelh tumna rilru chu hnam humhimna pawimawh tak a ni tih a sawi. Handloom tihhmawsawn a pawimawh tih sawiin, “Culture humhimna a nih tel bakah mi tam tak tan eizawnna tha a ni a. Mizoram leh hmarchhak state danga kan handloom hi demand a tha a, a san belh zelna’n pawh hma lak a tul a ni,” a ti.
Ministry of Textiles Weavers Service Centrem Mizoram Commerce & Industries leh Mizoram University hotute atangin thu an sawi bakah National Handloom Development Corporation atangin Yarn Pass Book hmanga puantahtuten kumtin man tlawm zawka la an lei theih dan tur sawifiah a ni a. Minister hian Yarn Pass Book leh lighting unit a sem a. Sericulture department hmalaknaa la rawng thlak zirna, Samarth training kalte hnenah certificate hlan a ni bawk.
National Handloom Day hi kum 2015 atang khan hman tan a ni a. A lawmna pui ber chu Pragati Maidan Delhi-ah Prime minister Narendra Modi hoa hman niin, he ni puala Prime minister thuchah chu India ram hmun hrang hrang atangin NIC Centre-ah weaver-ten an lo ngaithla a ni.