National Sports Day hmang

August 29 kha National Sports Day 2023 a ni a, Aizawlah pawh Sports minister Robert Romawia Royte hoa hman niin, Major Dhyan Chand Best Athlete Award lawmman sem nghal a ni.
Minister chuan tunhnaia Mizo infiammiten international medal 166 leh national medal 388, regional medal 296, a vaiin medal 850 an hlawhchhuak tih a sawi a. Asian Games awm tawh tam takah Mizo kan tel pha lo thin a, kumin Asian Games-ah chuan Mizo thalai infiammi an tel dawn tih a sawi.
Sports infrastructure siam kawngah Mizoram sawrkarin nasa taka hma a lak thu a sawi a. Hei hian medal mai ni lo, hriselna leh zirna kawngah pawh nasa takin hmasawnna a thlen mek tih a sawi.
International boxer pahnih – Zorammuana leh Rudy Lalhningmuani hnenah Major Dhyan Chand Best Athletes Award hlan a ni.
Asiam Games ah hian Mizo pathum – Lalremsiami (hockey), Lalchungnunga leh Lalengmawia Ralte (football ve ve) te tel tura tihchian tawh niin, midang – Vanlalthlamuanpuia (Taekwondo), Hmangaihsangpuia (Karate) leh Lalhumhimi (Judo) te buaipui mek an ni.
He inkhawmah hian SAI NERC Imphal regional director Lianhmingthang Tonsing leh Sports secretary Dr. Lalrozama ten thu an sawi bakah Sports & Youth Services director Lalnunhlua kaihhruaiin Fit India pual thutiam sawi rual a ni.
Sports Authority of India Training Centre Aizawlah hian sports discipline pali – Boxing, Judo, Taekwando leh Weightlifting kalpui mek a ni a, tunah hian infiammi 44-in training an nei mek a, coach pathumin an enkawl a ni.
Sports Day lawmna hi thuang hniha thenin, thuang hnihna hi World Boxing Champion 2006 Jenny R Lalremliani hoa hman a ni.