Naupang kawthalo laka
ven beihpui thlak dawn
District SDC Steering Committee Lunglei chu an chairman, bawrhsap Navneet Mann hoin an thukhawm a. Lunglei district-a kawthalo (diarrhoea) vanga naupang thihna a thlen lohna tura ni 45 (June 16 – July 31) chhung beihpui thlak, Stop Diarrhoea Campaign (SDC) kalpui dan tur an sawiho.
SDC hi kawthalo vanga naupang kum 5 hnuailam thihna thleng thin venna tura ruahman a ni a. Tun dinhmunah India rama nau piang (kum 5 hnuailam) 1000 zela 28 chu kawthalo vangin an la thi thin a, kum 2030-ah chuan 23-ah tal tihhniam tum a ni. Naupanga kawthalo vanga thihna a thlen lohnan kum 2014 atang khan kumtin fur thlen hma chawlhkar hnih chhung Intensified Diarrhoea Control Fortnight hman a nih bakah ORS leh Zinc tablet sem thin a ni a. Kuminah ngawrh zawka beihpui thlak tumin Stop Diarrhoea Campaign hi kalpui tum a ni.
Report-a a lan danin, kum 2024-a IDCF kalpui chhung khan Lunglei health district (Lunglei leh Hnahthial district inkawp) ah kawthalo ven/enkawlnan ORS leh Zinc tablet pek tur naupang kum 5 hnuailam 14408 tinzawn a ni a, mi 14661 (101.76%) hnenah pek a ni. Kumina SDC kalpui chhung hian Lunglei leh Hnahthial district-a naupang kum 5 hnuailam 14962 tinzawn leh an ni.
Health department record danin, 2024 April atanga kumin March thleng khan Lunglei district-ah naupang kum 5 hnuailam kawthalo vei 763 awmin, ORS 883 leh Zinc tablet 744 pek an ni a, thihpui an awm lo. April 2024 – March 2025 chhungin Lunglei leh Hnahthial district-ah nau piang 2368-ah naupang kum 5 hnuailam thi 43 awmin, nau piang 1000 zelah naupang kum 5 hnuailam 18.16 thi ang a ni. An zinga 38 chu nausen (kum 1 hnuailam) niin, infant mortality rate hi 16.05 a ni a; thla khat tling lo 23 awmin, neonatal mortality rate (NMR) 9.71 a ni.
Naupang kawthalo laka ven beihpui thlak dawn
Get real time updates directly on you device, subscribe now.