Nausen thihna a ‘serious’

Sawrkar kum chhiar anga chhutin nikum chhung khan Khawzawl district-ah nausen thi 16 an awm a; kumin kal mekah 9 an awm tawh.
Report danin, 2023 April atanga March 2024 chhungin nau piang 284 awmin nausen thi 6 leh pian hlima thi 10 an awm. April – July 2024 chhungin nau piang 72 awmin nausen thi 8 an awm.
Hei hi tun hnaia Khawzawl district-a nu leh nau chunga thihna leh nausen thihna thleng thin tih tlem dan ngaihtuaha thutkhawmnaah tarlan a ni.
Kum 2020 khan Mizoram Infant Mortality Rate (IMR) chu 3 a ni a, hei hi India ramah a hniam ber. Kum 2008 atanga 2015 thleng khan Mizoram IMR hi 32-37 inkar a ni chho ngar ngar a. 2016-ah 27; 2017-ah 15; 2018-ah 5; 2019 leh 2020-ah 3 a ni.
Tuna Khawzawl district-a 2023-24 nausen thih dan en hian, za zela 5.6(%) a tling daih mai a, 1000 zela thi zat chu 56 a ni dawn tihna a ni.
April-July, thla li chhungin nau piang 72 awmin nausen thi 8 an awm hman bawk a. Hei phei hi chu za zela chhutin 11.11% a tling hial a, a sang hle a ni.
Health department lam hmalak dan kan hriatpui kilh kelh pha lo a, mahse, kum 8 chhung (2008-2015) IMR sang taka kan awm hnua a hnu lama kan tlakhniam tak duai duai dan hi, engtia hmalakna vang nge tih enlet a, zirchian leh hial a pawimawh awm e.
Mizoram hi India rama mihring thawlna ber pathumna kan ni a. Chuti chung chuan family planning zawm tha ber kan ni thung. India ram hi khatih lai khan khawvela mihring tamna ber dawttu a nih avangin family planning kalpui a ngai tiin na taka hma lak a ni a. Khatihlai khan mihring tlemna ber Mizoram chu Family Planning zawm tha ber kan ni.
Tun hnuah hian ruihhlo leh AIDS bakah natna hrang hrang vanga thi kan tam chhoh tak em avangin leh, tam hi hmansawnna tur kawngah a pawimawh tih hriatchhuah thar zel a lo ni bawk a, mihring pian pun a ngai tiin kil hrang hrang atangin hma lak thar leh mek a ni a. Chutih laia nausen piang hlim thihna a hluar chho leh mek hi ngaih ‘serious’ a ngai hle tih a lang.
Tunhma, hriselna lam leh thianghlimna lama kan la hniam laia nausen pianghlim thihna a hluar thin a nih pawhin, tun hnuah chuan thiamna a lo sangin inenkawlna pawh a lo changkang tawh a, thihna hi kan tuar nep zawk tawh tura ngaih a ni. Hetih laia nausen pianghlim thihna a rawn hluar chho tan leh ta hi, hriselna lama mithiamte hian beihpui an thlak a pawimawh ta hle a ni.