Nawr fe hnu ah school tuala class lakah hma la

Rangvamuala Govt. Nepali Primary School zirlaite an sikul kawt tuala class an lak a ngaih thin avanga Mizo Zirlai Pawl-in sawrkar a ngaihchan hun tawp ral thlengin hmalakna a awm loa, sikul hulhliap zarin hnatlan tum thu sawi hnu ah hma lak a ni.
Govt. Nepali P/S a class room indaih loh avanga sikul tuala class lak thinah, MZP Branch Rangvamual-in hun rei tak ata hma a lo lak tawhnain ngaihsak a hlawh loh avangin MZP Gen. Hqrs chuan February 7 khan a hmunah a tlawh a. Zirlaite ni sensa leh ruahsur hnuaia class an kal chu pawi tiin, February 10 ralhmaa sawrkar thuneituten ruahmanna lailawk an siam lo a nih chuan MZP-in hma a lak tur thu a lo sawi tawh a ni.
Inrinni thlenga sawrkar hmalakna hriat a nih loh avangin MZP hian February 12-a sikul hulhliap zar hnatlang a ko a. Pathianni tlai khan Aizawl West-I bialtu MLA TBC Lalvenchhunga hoin School Education hotute leh MZP hruaitute an thukhawm a. Sawrkar chuan MZP ngenna angin Thawhtanni hian Govt. Nepali P/S zirlaite chu Rangvamual Community Hall-ah a sawn nghal dawn a. School building thar sak zawh a nih hma chu dah lailawk an ni ang. Samagra leh hmun dang atangin cheng nuai 26 hmangin school building thar an sa tan nghal anga, hmalakna hi chak taka kalpui tum a ni.
Hetianga sawrkarin hma lak a tum avang hian Thawhtannia Govt. Nepali P/S tual hulhliap siam hnatlang a koh chu thulh rih a ni tih MZP chuan an sawi.