Nawrhin medical lam nghawng nasa

CSS hnuaia mite nuarin kawng hrang hrangin mipui a nghawng a mek a, mipui a nghawng natna ber pakhat chu medical lam a ni ang. Inentirna hmun engemaw zat khar a ngai a, khar lohah pawh thawktu an awm mumal loh avanga mipuiin an dawrh theih chuan lo a awm teuh.
All Mizoram CSS Employees Coordination Committee huaihawtin dah ngheh phutin CSS (Centrally Sponsored Scheme) hnuaia mite an nuar mek a, Thawhlehni khan an tan. CSS hnuaia thawkte’n an hna an thawh loh avangin hmun engemaw zatah sorkar hna a chawl mek.
Medical lamah hian Mizoram hmun hrang hrangah thawktu an awm loh avanga inkhar an awm a, health & wellness centre, urban primary health centre (UPHC), sub centre, PHC, clinic, thawktu an awm loh avanga khar a tam a, khar loh, mahse thawktu an awm mumal loh avanga dawr theih chuan loh a tam bawk.
CSS hnuaia thawk, dah ngheh phuta nuar mekah hian medical lama thawk hi mi 2600 vel an awm a, chung mite an nawrh avang chuan khar ngai hi a tam a ni.
All Mizoram CSS Employees Coordination Committee lamin an chhinchhiah danin, Serchhip district-ah health & wellness centre leh UPHC 12 vel an khar a, Lawngtlai district-ah medical hmun hrang hrang 33 vel, Champhai district-ah 32 vel, Mamit district-ah 13 vel, Kolasib district-ah 12 vel khar a ni. Hnahthial leh Lunglei district-a khar zawng zawnghi 57 vel nia hriat a ni. Aizawl district-ah pawh khar hi a awm nual a, Aizawl Civil Hospital kawng hrang hrangin a nghawng tih thu dawn a ni.
Thil dangah pawh sit-in demonstration neia nuar mekte hian nghawng an nei nasa a, zirna lam leh medical lam hi chawp leh chilha mipui nghawng nghal thil a ni awm e. Sorkar department dangte pawh kawng hrang hrangin a nghawng mek.