NBA Champion thar Oklahoma City Thunder

June ni 23, Thawhtanni zing khan NBA Finals 2025 khelh zawh a ni ta a, inkhel hmuhnawm takah Oklahoma City Thunder chuan Indiana Pacers an hneh a, NBA champion thar an ni a, Oklahoma City-a an insawn hnua a vawi khat nan NBA-ah ropui takin an champion. Final khelh chhunga chetha tluang tak Shai Gilgeous-Alexander chu final MVP-ah thlan a ni.
Final-a intum Oklahoma City Thunder leh India Pacers te an inhnehtawk viau a, game ruk an khelh zawh thlengin champion thei an awm lova, 3-3 in an inhnehtawk. Champion zawk tur tihchianna, final game sarihnaah an innawr tawk viau a, hun pawimawh laia chetha zawk Oklahoma City Thunder in hnehna an chang ta zawk a ni. Kum 2016 khan NBA Final hi game sarih khelh a ngai a. Hemi hnu lamah hian game sarih khelh tlin ngai lovin champion an awm ta ziah a, 2016 hnu lama a vawi khat nan 2025 hi final game sarih khelh a ngaih leh vawi khatna a ni.
Final thawh sarihnaah team hnihte an khel tha tawn viau a, quarter khatnaah point an inluhchhawk zak zak a, an inlehthal tawn zak zak reng. Quarter khatnaah hian point thumin mualneitu Thunder hnihnaah Pacers an khel tha zawk hret a, point liin an chungnung ta mai a, point khata hmahruai chungin chawlhlawk an hmang.
Chawlhlawk hnu lamah Thunder in bul an tan tha nawn leh a, point 14 zeta chungnungin champion an hnaih ta hle. Inkhel pawimawh takah an player pawimawh Tyrese Haliburton a inhliam vangin Indiana Pacers in ngai an awh hleithei lova, an khingpuite an chhanglet hleithei meuh lo. Pacers hian inlehthalna lian thlentir ngei tumin quarter hnuhnung berah tan an khawh chiam a. Quarter hnuhnung berah hian point khatin chungnung bawk mah se an khingpuite hi point point 12 in an umphak zo ta lova, inkhel pawimawh takah Oklahoma City Thunder chu point 103-91 in hneh zo ta lova, a vawi khat nan NBA-ah champion nih an tumna an puitlin zo ta lo a ni.
Inkhel pawimawh takah hnehna an chan vangin Oklahoma City Thunder chu NBA champion thar an ni ta a, Oklahoma City-a an insawn hnua an champion vawi khatna a ni nghe nghe. Tun hma chuan Seatle-ah an inbun thin a, Seatle-a an inbun lai kum 1979 khan NBA-ah hian an lo champion tawh a. Oklahoma City-a an insawn hnuin an champion thei lo vang vang a, Kum 46 zet hnua a vawi khat nan an champion ve leh ta nawlh a ni.
Final thawh sarihnaah hian MVP thar Shai Gilgeous- Alexander a khel tha leh viau a, point 29 zet a thawhchhuah bakah assist vawi 12 a nei tling bawk. Final-ah a chetthat tluan em vangin Canadian Gilgeous-Alexander hi Final MVP-ah thlan a ni. Kum 26 mi hian season tha tak a hmang a, NBA Regular season-ah MVP atan thlan a ni tawh a, Final-ah MVP a nih leh bakah Oklahoma City Thunder a champion pui bawk. NBA player zingah hetiang tithei hi pali chuah an awm a, Shaquille O’Neal hnu lamah Shai Gilgeous- Alexander hi Regular Season MVP leh Final MVP ni a, final a team champion pui tel thei hmasa ber a ni.