NE thalai tana programme duan hawng

Sawrkar laipui Ministry of Skills Development and Entrepreneurship buatsaihin ‘Transforming Lives, Building futures Skill Development and Entrepreneurship in North East’ special programme chu hmarchhak state-te tan Union Minister for Education and Skill Development & Entrepreneurship Dharmendra Pradhan chuan Nilaini khan Delhi-ah a hawng.
A hawnnaah hian Union Minister for Culture & Development of North Eastern Region G Kisan Reddy leh Union minister of state for Skill Development & Entrepreneurship Rajeev Chandrashekhar te pawh an tel a. Mizoram telin hmarchhak state tin atangin inbiakhmuh theihna hmangin an lo chhim a ni.
Hmarchhak state-te hian theihna leh thiamna tam tak an nei a, state hmasawnna leh ram hmasawnna atana thalaiten skilling leh entrepreneurship ecosystem-a hmasawnna chak zawk leh rahbi thar an kai zel theihna’n he special initiatives ah hian cheng vaibelchhe 360 dah a nih thu puan a ni. Thalai 250000 chuang chhawr tangkai theih turin scheme hrang hrang duan sa hnuaiah training pek theih a ni dawn.
Hmarchhak state-te tana hmalaknaah hian Pradhan Mantri Kaushal Vikas Yojana hnuaia thalai nuai 2, National Apprenticeship Promotion Scheme hnuaiah thalai sing 3, Jan Shikshan Sansthans scheme hnuaiah thalai sing 2, ITI leh Polytechnic tihhmasawna’n leh SANKALP hnuaia North East region tan an mamawh bik dan azira special project neih bakah ram pawna hna zawng leh thawk duhte tan a awlsam zawkna’n Skill India International Centre din te a tel a ni.
A hawnna inkhawm hi Mizoram atangin LESDE secretary Lalramsanga Sailo leh director Angela Zothanpuii, School Education secretary Lalzirmawia Chhangte leh additional secretary Prasanna A Acharya, department hotu dangte bakah IIE leh NSDC aiawhten an hmanpui a. Educational leh technical institutions, Sawrkar department hrang hrang leh zirna in thenkhat bakah Skill Development Training Centres leh Institutions ten an chhim a ni.