NEP-ah naupang kum 3 atangin sikul lut tan dawn

NEP-ah naupang kum 3
atangin sikul lut tan dawn
Ram puma hman tur National Education Policy tharah chuan kum 3 an tlinin naupang chu school luh tan tir tawh tur an ni dawn tih Human Resources Development Board vice chairman Dr L Thangmawia, MLA chuan a sawi.
Govt. Kawlkulh High School chuan Zirtawpni khan an dincham kum 50-na an lawm a. He hun hmanpuitu Lengteng bialtu MLA ni bawk Dr L Thangmawia chuan India ramah National Education Policy thar hman tan mek a ni a, thil thar tam tak a ken tel zingah naupang kum 3 atanga sikul luh tan tawh tur a nih thu leh sports pawh zirna huangchhung (curricular) ah telh a ni tawh dawn, tiin, hlawhtling taka he policy kalpui a nih theihna’n Zoram mipui pawh kan inbuatsaih a ngai hle dawn tih a sawi a ni.
Mizoram khaw hrang hrangah zirna in hawn a nih theihna’n khawtlang nu leh pa ten tha an thawh nasa thin hle tih a sawi a. Mizorama zirna in zawng zawng deuh thaw chu khawtlangin private-a an din, a hnulama sawrkarin a lak chhoh tak an ni, tiin, “College tam zawk pawh chutianga an din chu a ni. Hei hian kan pi leh pu, nu leh paten zirna an ngaihpawimawh zia a tilang a, an tu leh faten mahni khua ngeia zirna kan chhunzawm theihna’n nasa takin an lo tuar a, vawiina mahni khua ngeia zirna chhunzawm theiten an chungah lawm nachang kan hriat zel a ngai,” Dr L Thangmawia hian a ti.
Govt. Kawlkulh High School hi kum 1972-a din niin, kum 2022 khan kum 50 a tling a. Harsatna hrang hrang avangin hemi kum hian jubilee an lawm thei lo a, kuminah an hmang a ni.