Netanyahu-a’n a tawp sik rãt tum

Israel Prime Minister Benjamin Netanyahu chuan US-in a sipai unit khat hrek a tum tia report awmah hrekna a laka kalpui tumna hrim hrim chu a hnawl tur thu a sawi.
“Ka theihna zawng zawngin ka bei let ang” tiin prime minister chuan a sawi a.
A hmain Axios news site chuan US chuan Israel sipai batttalion khat Netzah Yehuda te chu West Bank a human rights an bawhchhiat nasat avangin hrek a tum tiin a tarlang a ni.
Kar kalta khan US Secretary of State Antony Blinken chu Israel Defense Forces’ (IDF) units hnena US military aid human rights bawhchhiatna kaihhnawihah hrek a ni dawn em tia zawhna chu ‘Theihtawpin hma ka la a, ni reilote hnuah in hmu mai ang’ tiin a chhang a ni.
Washington chu Israel ally ber niin IDF unit te hnenah \anpuina a hreksak a la awm ngai lo.
Israel military te chuan Netzah Yehuda te chu international law ang thlapa kal tiin an sawi bawk a.
“Battalion hrek tumna a awm tia sawi chungchangah IDF chuan engmah hriat a nei ve lo,” tiin Israel military te chuan an sawi a. “IDF te chuan thil danglam thleng te chu dan ang thlapin leh a \ha thei ang berin a chhuichiang zui zel ang,” tiin tarlan a ni bawk.
Israel Defence Minister Yoav Gallant chuan US chu Netzah Yehuda te hrek a tumna chu hnukkir turin a ngen a, khawvelin US leh Israel inlaichinna chu chik zawka an thlir mek lai a ni, a ti a.
“Unit pum sawiselna awm thei siam a nih chuan IDF hmalaknaah sawihnawm zui theih tam tak a awm thei a ni,” tiin Gallant chuan a sawi a, “tun hi \hian \ha te tan inselna hun a ni lo” tiin a sawi bawk.
Kar kalta Inrinni khan Axios chuan US thuneitu sang pathum te a\anga a thu dawn tichhuakin Blinken chuan Netzah Yehuda te hrekna tur chu a puang thuai dawn a ti a.
Hrek an nihna chhan tur a tarlanah West Bank a an chetlak danah human rights bawhchhiat a ni tia sawiin Palestinian-American kum 80-a upa Omar Assad chu January 2022 khan Israel sipai tena an dapchhuahna lamah tihhlum a ni tiin a tarlang.
Khatih lai khan US chuan a khua leh tui thihna chu kimchang taka chhui chian vek a phut thu a lo sawi tawh a. A hnuah IDF te chuan Assad thihna chu pawi an tih thu sawiin Netzah Yehuda commander chu hrem ngei a ni ang a ti a. Sipai pahnih te chu kum hnih chhung senior position an luah a phalsak dawn lo ti bawkin mahse thiam loh chantir erawh an ni lo thung.
US chuan IDF unit te US military assistance dawng ve thei lova a siam lui a nih chuan kum 1997-a khatihlaia Senator Patrick Leahy hmalaknaa “Leahy Law” tih hnuaiah kalpui a ni dawn a. He dan hian foreign military unit te chu human rights an bawhchhia a nih chuan US fund te dawng thei lova siamna a ni.
Nikum khan US official rual te “Israel-Leahy vetting forum” te chuan Israeli unit te puhna hrang hrang te chhui chianna an lo nei tawh bawk.
Netzah Yehuda hi kum 1999-a din niin mipa chauh awmna leh ultra-Orthodox Jews te chauh awmkhawmna a ni.
Kar kalta khan US state department chuan Israeli far-right activists Ben Zion Gopstein te chu a hrek tawh bawk a. Heng pawl te organisation Lehava te chuan West Bank a tharum thawhna an tihluar tiin a tarlang.