New York lalnu thar Coco Gauff

New York lalnu thar Coco Gauff
Flushing Meadows, New York-a Inrinni women’s singles final-ah American tleirawl kum 19 mi Coco Gauff chuan 2-6 6-3 6-2-a Aryna Sabalenka hnehin Grand Slam singles final a khelh vawihnihnaah a major title hmasaber a hlawhchhuak ve ta nge nge.
Arthur Ashe Stadium-ah seeded sixth Gauff hian beiseina nena amah thlirtu a chipuite hmuh laiin bul a tan tha nghal buan buan lo a, set khatna phei chu chiang fahranin a hloh a, mahse, zawi zawiin inrintawkna a neikir a, second seed Sabalenka lakah hriatreng hlawh tawh tur hnehna hlu bik a sualchhuak ta a ni.
Inkhelh banah Gauff hian a hun tawn chuan a barakhaih tih a sawichhuak hial a, Pathianin ram tha leh zual thleng turin hun thim leh harsa a paltlangtir nia a ngaih thu a sawilang tel.
2022 French Open kha American mihangin tunhma lama major singles final a khelh awmchhun niin, tah khan a champion zo lo a, an ram leilung ngeiah final lut lehin, a champion ta a, hun harsa leh tahna a lo tawn tawh khan an kawtkaia hun ropui bik tawngbaw turin a hrualfip nia a ngaih thu a auchhuahpui ta a ni.
Stadium chhunga mipui 24,000 dawn khan a inkhelh chhung zawngin tualchhung nula an tanzia an tilang a; a championship point hmasabera backhand winner hmanga hnehna a chan rualin court chhuatah Gauff a thal tawp a, a kuta a hmai hup vang vangin, chutah a thochhuak a, amah thlawptu fans chunga a lawmzia lantirin, a champion lai thlirtu a nu leh pa Coreyleh Candi a pan a; inkhelh banah Gauff chuan a pa akuah lai khan a hmu miah lo tih a sawi.
Champion thar chuan sawizamwin, “Hmu lo mah ila min kuah tur khan a lo pharchhuak tih ka hria a, a tap ri pawh ka hre thei.
“Ka hringnunah patling tap hi ka la hmu ngai lo a; ka nu pawh kha ka chak emaw chak lo emaw tap tur tho tho a ni. Khatih hun lai khan ngaihtuah mumal hi ka nei lo a ni ber a, ka sawi ber chu ‘Lalpa, ka hun tawn hi a tak a ni meuh maw’ tih zawng hi a ni,” a ti.
Vawiina ranking thar tar-chhuahah Gauff hian a career-a a tawnsanber hun tawngin pathumna a ni dawn a, mahse, chu ai chuan a home Grand Slam ngei maia a major title hmasaber sualchhuah kha a hlu zawk lo thei lo.
Kum 2019 khan tleirawl kum 15 mi lek ni chungin Wimbledon-ah hmuhnawm takin a inlan a; kumin July thla All England Club grass-court Grand Slam-ah erawh first round paltlang zo loa tlain, tunah erawh an kawtkai ngeiah lehnghal Grand Slam champion a ni ta nge nge a, kum 1999-a champion Serena Williams hnu lama US Open-a American tleirawl champion leh thei hmasaber a ni.
Australian Open champion Sabalenka tan a major title pahnihna tur a tawlhbo ta rih a; kum 25 mi Belarusian hian vawiina WTA ranking thar tarchhuah turah world number one dinhmun a luah dawn a, New York tournament lianah champion zo lo mah se a career-ah bung thar a kai zui dawn ta tho a ni.