Ngaihven hlawh Delhi buainaa man pahnih bail phal lo

Ngaihven hlawh Delhi buainaa man pahnih bail phal lo
Kum 2020-a Delhi-a buaina chhuak, mi 53 thihna thleng kaihhnawiha man zirlai hruaitu hriat hlawh tak pahnih chu kum nga chuang lung ina dah an nih hnuah court-in bail-a chhuah dilna a hnawlsak.
India-a Supreme Court chuan Thawhtanni khan Umar Khalid-a leh Sharjeel Imam-a te bail dilna ngaihtuaha thutlukna a siam hi a puang a ni.
Police chuan an pahnih hian buaina chhuaka thi tam zawk Muslim thlenna kha anmahni phiar chhuah niin an puh a. Firfiaka chetna dona dan khauh tak hmanga man niin bail-a chhuah pawh a harsa hle a. An puhna hi an pha a, vawi eng emaw zat bail hi an lo dil tawh a ni.
Court hian he thubuai thova man mi dang panga erawh bail-a chhuah a phalsak thung.
Ram khawpui bera buaina chhuak kha thla eng emaw zat chhung citizenship law duh loh lantirna hun laia thleng a ni.
Thawhtanni chawhmaa judge pahnih awmna bench-in thutlukna a tihchhuahah bail diltu mi pasarihte chu an mi mal nun thlenga ngaihtuahsakin ‘buaina chhuaka an tel dan pawh a inchen lo’ niin an sawi tih dan lam ziahna website, Bar and Bench chuan a tar lang.
Judge-te chuan Khalid-a leh Imam-a bik inhnamhnawihna chu a nasa a, bail an dilna pawh hnawlsak an ni tih an sawi a. An duh chuan kum khat hnuah bail an dil leh thei ang tih an sawi bawk.
Khalid-a hi kum 2019-a Delhi-a Jawaharlal Nehru University atanga PhD zo niin Imam-a he university thova doctoral scholar a ni thung a. Kum 37 mi ve ve an ni.
An pahnih thubuai hi India ram bakah khawvel pumin a ngaihven a ni.
October, 2022 khan Supreme Court judge hlui, high court judge chawl tawh pathum leh union home secretary chuan an lakah hian firfiaka chetna avanga hremna pek theihna khawp finfiahna hmuh a nih loh thu report an lo ziak tawh nghe nghe.
Kar hmasa maiah khan US Congressmen leh Senator-te pawhin Washington-a Indian palai hnenah ‘an chungthu ngaihtuah lova rei tak hren an ni chu an ngaihtuahin an ngaihven reng’ tih an lo thlen tawh bawk.
An pahnih hian Unlawful Activities (Prevention) Act (UAPA) tlawhchhana man niin firfiaka chetna dona dan a ni a, he dan hnuaia mante tan hian bail hmuh a harsa hle a, kum eng emaw zat chhung chu an thubuai ngaihtuah chhung pawh an tang thei thin a ni.
Khalid-a hian kum nga liam ta chhungin court hrang hrangah vawi nga bail a dil tawh a. Kum 2024 leh 2025 khan an chhungte inneihnaa tel turin rei lo te ve ve a lo chhuak tawh a. Imam-a hi a hmain a dilna vawi hnih hnawl a lo ni tawh bawk.
Thawhtannia bail phalsak tak bikte hi Gulfisha Fatima, Meeran Haider, Mohd Samir Khan, Shadab Ahmed leh Shifa ur Rehman te an ni.
Kum 32 mi, Fatima-i hi Delhi University-a business administration graduate a ni a, mi dangte hi mihring dikna chanvo humhalhtu, Citizenship Amendment Act duh lotute an ni.
Khalid, Imam leh mi dangte hian September, 2025 khan Delhi High Court-in an bail an dilna a hnawlsak hnuah Supreme Court-ah hian an thlen leh a ni.
Buaina chhuakah khan an inhnamhnawih ngei tih finfiahna engmah awm lovin kum nga chuang lung inah an awm tawh tih an insawi a, ‘chungthu ngaihtuahsakna awm lova inhremna’ an tuar ringawt niin an insawi a ni.