Ni 19 chhungin hri vei thar awm lo

Covid-19 hrileng a zia zel a, vanneihthlak takin
Mizoramah ni 19 chhungin hri vei hriatchhuah thar an awm lo.
IDSP te’n an chhinchhiah danin, July ni 12 khan hri vei hriatchhuah thar pakhat a awm a, chumi hnuah, July ni 31 tuka result chhuak thleng khan hri vei hriatchhuah thar an awm lo.
Hri vei hriatchhuah thar an awm loh bakah, Mizoramah hri vei mek an awm lo a, July ni 17 hnuah hri vei enkawl mek an awm lo.
Vanneihthlak takin tun hnaiah Covid-19 vanga nunna chan an awm lo a; IDSP te’n an chhinchhiah danin, June ni 22-ah nunna chan pakhat a awm a, chumi hnuah July ni 31 tlai lam thleng khan Mizoramah hri vanga nunna chan an awm rih lo.
May-ah Hri hi a hluar a, mi 375-in an vei tih hriatchhuah a ni. June-ah a tlahniam a, mahse hemi thlaa hri vei hriatchhuah zat hi 116 a tling. July-ah a tlahniam a, thla chawhnu lamah phei chuan Mizoramah hri vei hriatchhuah thar leh hri vanga enkawl mek an awm lo.
Covid-19 hi Mizoramah 2020 khan mi pariatin an thihpui a, 2021-ah nunna chan zat hi 537 a tling. 2022-ah 181-in nunna an chan a, kuminah mi pariatin nunna an chan tawh. Hri vanga nunna chan hi an vaiin mi 734 an ni.