Ni hnih chhungin Shillong atanga lak ganja kg.70 chuang man hman

Tunhnai ni hnih chhungin Shillong lam atanga lakluh nia sawi ganja, a vaiin kg. 70 chuang chu Aizawlah man a ni.
Excise & Narcotics department, Central YMA Kumpuan Committee leh Field Intelligence Unit (FIU) Assam Rifles thawkho chuan September 5 zan dar 9.30 khan Chanmari West (Sairang Road) ah ganja kg 28 & gram 237 leh a neitu nia puh – Zathanga (30) Bilkhawthlira khawsa nia inchhal an man a, ganja a phurhna lirthei Tata Yodha MZ01 Z 8256 pawh hren nghal a ni.
Excise & Narcotics Department leh FIU Assam Rifles thawkdun hian September 5 zan dar 11.20 khan Falkland Vengah heroin gram 220 (hawng 18) leh a neitu nia puh mi pali – Sabir Hussain Laskar (44) Howaithang, Cachar district Assam; Kuti Raja (40) Joyahanpur, Cachar district; Lalditsang (35) Zonghaklien, Parbung, Churachandpur Manipur (tuna Chite Veng, Aizawla khawsa mek) leh Lalchawngzovi (47) Chite Veng Aizawla khawsa nia inchhalte an man.
Ganja leh heroin vanga mante hi the ND&PS Act 1985 tlawhchhanin thubuai siamsak an ni.
Tarlan tawh angin, Excise & Narcotics department leh Central YMA Kumpuan Committee hian September 5 zing dar 2.10 khan Durtlang Kawnvengah ganja kg. 44 leh inhnamhnawih nia puh mi pahnih an man.
Ganja man hi state thenawm – Meghalaya atang bakah Tripura atanga Mizorama lo lut a ni tih sawi a ni a. Ganja phurh kual, neih, kawl, zawrh, lei leh hman bakah inbul huan leh loa ganja chin hi the Narcotics Drugs & Psychotropic Substances Act 1985 tlawhchhana thubuai lian tak neih theih a nih avangin ganja laka fihlim turin mipui hriattir an ni tih Excise & Narcotics chuan an sawi.