NI ZAMI

JC.Zoremi Hmar Joute

Thingtlangah chuan naupang hi kan nula tlangval hma em em a, kum 25 te kha chu kan hmu chal ruau mai a, tunah lem kum sawmthum pelh tawh pawhin tleirawl emaw kan la in tiatt(eeehh); kei pawh kum sawmpanga ka tlin chuan mitthi thing khawn te, khawhar in kal te chu ka tih turah ka ngai hmiah tawh. Information center-ah thawm a rawn awm rawk rawk a, a’n kiu vang vang phawt a, chhiat tawh thu an han puang zui a. Tuma tirh leh sawi ngai lovin tlangval te’n hnathawh kawr nen thlanmual an pan nghal sang sang a, nula tui sem tur pathum velin an zui bawk a.
Thlanmual kal ve lo nulate pawhin an tih tur an hai lo; mitthi in singsa fel turin an kal nghal dial a, veng chhung nula kuta awm deuh bik a ni a. Mitthi awmna chhungkua kha eng ang mi nge an nih tih hre lovin, mi hmuha mawi lo tur deuha che hnawk deuh pawh lo ni se, mi hmuh hman hlauvin an thenfai sak sawk sawk thin a, an mawi lohna lai sawi miah lovin an thup mawi zung zung thin. An mawina chu pawn lam landan, an incheina-ah ni lovin, zonun ze mawi chu an mawina a ni tih hrilh ngai hmel awm reng reng an awm lo.
Tlai a lo ni a, mipa naupang fel deuh chinin ipte akin mitthi buhfai an khawn a. Nula ten thing an khawn thung. Zan a lo nihiin thalai tawh phawt chu khawhar in lam panin an kal sung sung a, dam reng si-a khawhar in kal loh chu thalai tan thil zahthlak anga ngaih a ni thin. Kei pawh khawhar in kal rual ka rawn ni a, nula fel tak ni tura nunchan zir ve tanin, aia u deuh hnung kan zui ve ta dat dat mai. Hetih hun laia min kaihruai tur hian ka pa hian rin zawng deuh a’n nei ngei ahh, chumite chu U Bitei leh Ni Zami te an ni.
An hmel han en hian an rintlak teh tawh viau tura ngaih theih an ni a, nula mah ni se khaw khat pa rawn ni mai awma mawi hi an ni vei reuh a. Lu zo veh vawh, an nungchanga hming hliauna nei lo, tleirawlte entawn an ni. An pahnih rau rauah hian Ni zami hi kan in a inhnaih deuh avanga ka zui tam deuh zawk a ni bawk a, kan thlur bing deuh dawn a ni.
Thisena inzawm hnaivai kan ni hauh lo va, mahse ka ni Zami a ni tlat mai a ni. Nula kum 30 mi vel, nu te lampang niin a sam, luphut leh hrik huangtau lutuk tur ven nana chingal fira suk zeuh zeuh tih hriat zeta sen ro khawng fua mai chu a beng khuh tawk vel chiah hian a tan rual hmaih a. A chalsam pawhin a mithmul a hliah ve chiah bawk. Nula e tilo hian a el a tikun hleu reuh a, hnung lam atanga en paw’n kun du angin a lang reng a ni. Hma lam atanga en chuan a dak deuh er lawi a, kal deuh nghat nghat, pen nghet charh mai a ni a, a kethiah pawh an chhuanawm veng vawng hle; hei vang tak hian fur laia thlawhlai nala hlo a thlawh pawhin ke lawng bun a thlang mai thin.
Tlangval mai mai hi engah mah a ngai lo va, a tan tlangval aiin fah thing phur khat an hlu daih zawk! Nula taima leh lerh ngaihna reng reng hre lo, hlauh em em pawh nei chuang lo a ni. Ram kal a duh pawhin a kal mai a, len den a duh chang leh thang kam a duh chang pawhin tumah a pur buai lem lo. Khaini bur thar hi a beng bulah a’n hmet sak sak a, a chik dan azirin a al leh al lo a hre nalh nalh thei!
Zan khat chu khawhar ina kal turin min rawn sawm leh a, kum 16-na ka hmang ve mek chauh a ni a. Kan kalna tur chu chhim veng tawp daih niin a hla hle mai a. Mahse ka kalpui chuan midang ruala kal ve kher emaw, mipa an tel ve kher chu tul a ti lo ngang mai. Kei pawh tu bul maha kal tur ka ni lo a, ka ni Zami bula kal tur ka nih miau avangin ka thla a muangin midang ka mamawh bik lo. Ka insiam sawk sawk a, room atanga ka va chhuah chuan sitting room-ah a lo thir seh nuih chui chui a, an huan a thlawh chanchin te, rultuha a reh hlum thu te a lo sawi zuah zuah a, lakhuihthei, ha hmanga kheh a hautakzia a sawi chu ka awih khawp mai. A titi tui viau na a, kan kalna tur a hlat deuh avangin kan inzui chhuak ta chhur chhur a.
Zozial, ama zial ngei mai, rim ru hek hawk leh lian telh tawlh chu a’n tan a, a pak pang aw zial luih luih mai a, ka biak apiang chuan a rul tawk hian min chhang ve zel a. “Ni Zam, hetia kan kal lai hi mipa sual deuh ten min rawn tibuai ta se engtin nge kan tih ang?” ka han ti a. A meizial a chhem tek chuaih ah, “An tilmu hmeh keh sak hmak mai tur” a ti mai a! Ka thla a muang ngei mai. Nu lian leh sek tha tak ni lo mah se a rilru huaisenna hrim hrim pawh kha thlamuanpui tham a ni takzet a ni.
Kei lah naupang mai tih takah, zawhna atthlak deuh deuh kha ka zawt deuh reng mai si a, tun hnu-a ka ngaihtuah leh hian ka inthlahrung leh deuh rum rum. Kawtchhuah veng kan thlen chuan, “Ni Zam, ramhuai hi an awm ve i ring em?” ka han ti leh a, “Umm” a lo ti ringawt a. “A nih leh thlahrang hi an awm i ring em, i hlau ve thin em?” ka’n ti leh a, a meizial vap sei tawh deuh, kun deuh ngoh chu a’n liak leh te te a, “Min hlau daih zawk ang chu..” A ti sam leh et a. A khat tawk hian a zial zuk lai chu min pe leh chut thin a, ka lo duh ngai lem hlei lo va.
A mei zuk, a tlawn thumna a liah hlum rual chuan kan thleng ve ta. An lo khat deuh thap tawh na-in, Zami meuh a luh chuan thutna an lo kian nghal sap sap a, zaka kun cheih cheih rual a ni tawh lo bawk nen; a hawi vual vual a, a nui chuaih a, a thu ve ta chut a. Ngopa thalai rual zaikhawm chu an zai thiam ngei mai. Khawhar chhungte tan pawh lungngaih a hnemin a thlamuanthlak viau awm e. Lo phun sur sur emaw, zai ve lem lova lo kut chi lo hawi mai mai kan awm lo va, an kal chhan hriain theihtawp chhuahin an zai theuh a. An zai tui dawn chauh emaw tih laiin ban a lo hun dawn ta der mai a, YMA hruaitu lo dingin thalaite fuihna thu tawi te a sawi hnu-ah kan tin ta a.
Sawi tawh angin mitthi in hi veng hmawr lam a ni a, keini lah veng lehlam tawp atanga kal kan ni bawk a. Hetianga veng hla deuha mitthi an awm hi chuan tlangval tlawmngai ten veng hla deuh zawk atanga lo kal nula, mipa kalpui nei lem lote chu an thlah mai thin a. Veng hla-a awm kan ni a, kalpui mipa kan nei lo bawk. Chutia hmeichhe pahnih, veng tawp atanga veng lehlam tawpa haw tur ta chu, tlangval fel leh bengvar tak takte chuan, “E! Kan lo thlah ang che u, in veng a hla si a, ti r’u, i kal ang u” an han ti a. Ni Zami ngaihdan a lo ni bau lo!
“A ngai lo, kan haw ve mai ang”
“A, in veng a hla si a, eng emaw tawn palh a hlauhawm alawm, kan lo thlah ang che u.”
“Ke kan nei, kan haw ve mai ang. Tu thlah mah kan ngai hêk hûk lo”
“A nih, high school chhak thleng tal kan lo zui ang che u chu…?”
Zami thin a rim tak tak ta. “A ngai lo kan ti kan ti a ni lo’m ni, in hur a mi? Ka vawm darh vek mai tur cheu sin” tih leh lung zawn a rual ta vut vut mai a! Kan tlangvalte chuan tlanchhiat pahin, “Kawrtanah thinlanga’n a lo thenkhum dawn cheu nia” an han ti hram a, Ni Zami thinrim chu a tap lo chauhin ka hria. Ka nu leh pain zui tura min thlan sak, midang kawm lo va ani chauh hi kawm tura min tih chhan chu ka hrethiam ta mai; kan him nge nge dawn a lo nih hi!