NIA kutah Pahalgam beihna chhui hna dah
NIA kutah Pahalgam beihna chhui hna dah
Ministry of Home Affairs chuan Pathianni khan Pahalgam-a mi firfiakte chetna chhui hna chu National Investigation Agency (NIA) chhui turin a ti.
“IG, DIG leh SP kaihhruaina hnuaiah NIA team-in hmun mawi leh nalh tak, Baisaran-a thil rapthlak thleng hmutute an kawm ang a. An mi kawmte hnen atanga an thu hriatte chu remkhawmin Kashmir-a pawikhawihna rapthlak ber thleng hi an phuah khawm dawn a ni,” tiin NIA chuan thu a chhuah.
“Mi firfiakte chet vel dan leh an hnu chhuina atan chhuahna leh luhna zawng zawng NIA team hian an vilin an thlithlai dawn a. Forensic leh thil danga thiamna bik neiten an pui ang a, ram barakhaihtu firfiaka chetna thleng inphiar dan hi chiang taka hai chhuakin fiahna chiang tak hmuh an tum dawn a ni,” an ti bawk.
Mi 26 thihna, Thawhlehnia Jammu & Kashmir -a Pahalgam-a mi firfiakte chetna hi chhui zui mek zel a ni a. Inrinni khan mi pathum awmna NIA team chuan a dam chhuakte thil hriatte a la khawm bawk.
Intelligence agency-te chuan Jammu & Kashmir-ah hian an hriat theih chinah active takin mi firfiak 14 an awm niin an ngai a. Heng zinga pariat hi Lashkar-e-Taiba (LeT) niin Jaish-e-Mohammad (JeM) leh Hizbul Mujahideen (HM) pathum ve ve an che vel reng niin an sawi.
Agency-te chuan langsar taka che lem lote nen firfiak hi 50-60 vel an awmah an ngai a. Mi 14 bik hi an nihna kimchang, an address leh an chet vel dan an hriat chian a ni.
Mi firfiak 14 zinga a tam ber hian kum 2021 hnu lam khan Pakistan-a firfiak pawl hi an zawm hlawm a, kum 20 chuang awrh ni hlawmin an sawi a. Shopian-ah panga, Pulwama-ah pali, Anantnag-ah pahnih leh Sopore, Awantipora leh Kulgam-ah pakhat theuh an awm niin an sawi.
Ningani khan Jammu & Kashmir Police chuan Pahalgam-a che nia hriat mi firfiakte lem ziah pathum a lo tichhuak tawh a. An zavai hian Lashkar-e-Taiba mi an ni.
Heng mite hi Adil Hussain Thoker, Ali Bhai (Talha Bhai tia an koh) leh Hashim Musa (Suleiman tia an koh) te an ni.
Musa leh Talha hi Pakistani nia hriat an ni a, Thokar erawh Kashmiri a ni a. An chin hriate hnenah Rs. 20,00,000 pek an tiam bawk.