Niger coup leader ten inbiakna nei turin inhawn thu sawi

Niger junta te thla kaltaa civilian sorkar paihtla tute chuan inbiakna nei tura an inhawn thu an sawi a, hetihlai hian Russia leh United States te chuan peaceful resolution a awm theih nan ngenna an siam a ni.
Khawthlang ram te leh democratic African sorkar te chuan coup leaders te chu paihthlak tak Preisdent Mohamed Bazoum July 26 atanga an hren tawh chu chhuah zalena thuneihna pelet turin an ngen a, mahse, junta te chuan ngenna chu engahmah an ngai lo thung.
Ningani khan West African amry chiefs te chuan Ghana-ah inhmuhkhawmna neiin sipai chakna hman tur a ni em tihte pawh an rel dawn nia sawi a ni a, hetihlai hian regional bloc Economic Community of West African States (ECOWAS) te chuan diplomacy a hlawhchham chuan sipai chakna hmanah an vau reng thung.
Sipai chakna hman a nih chuan rethei bakberhsa Sahel region chu a ngelnghet lo zual dawn hle tura ngaih niin helai hmun hi insurgency group al Qaeda leh Islamic State te nena inzawmna nei tamna niin kum tam tak chhung buai harsatna in a nuai tawh te an ni bawk.
“Inthlakdanglamna hun kan tawng mek a. Thil engkim sawifiahna kan nei a, inbiakna neih a nih theih nan kan inhawng a, mahse kan ram hi independent a nih reng a ngai a ni” tiin Ali mahamane Zeine, sipai tena karkaltaa prime minister atana an ruat chuan a sawi.
Zeine hian kum 2021 a civilian sorkar paihthlaa thuneihna chang tho Chad president Mahamat Deby chu tlawhin a hmu bawk a. Niger a sipai tena thuneihna an chan hi kum thum chhunga West leh Central Africa a sipai tena sorkar an paihthlaka thuneihna an chan tum sarihna a ni.
Russian President Vladimir Putin chuan Thawhlehni khan Niger thenawma Mali military leader te nena inbiakna a neihpui a, hei hian Khawthlang ram te chu ngaimawh taka siamin Russia chuan West Africa a Sahel region chu thunun a tum anga ngaihna an nei bawk a ni.
Putin thung chuan Sahel region ah peaceful resolution a awm pawimawhna a sawi tiin Mali interim President Assimi Goita chuan social media platform X ah a sawi.
Pentagon spokesperson Sabrina Singh chuan U.S. President Joe Biden’s administration chuan diplomatic resolution awm se a duh tia sawiin Niger chu an thawhpuina hloh an duhloh a ni, tiin a sawi bawk.
Hetihlai hian ECOWAS te chu Central Africa regional bloc ECCAS te chuan Niger chungchangah an thlawp thu an sawi tiin Nigerian President leh ECOWAS chairman ni bawk Bola Tinubu chuan a sawi bawk.
West Africa-ah Russian influence a nasa zel a, Mali leh Burkina Faso a military leader te chuan an ram atangin colonial power France sipaite pawh hnawtchhuak tawhin chutihrualin Moscow nena inthianna an tichak zual zel bawk.
Mali bikah phei chuan army sorkar chuan Russia Wagner group te chawlutin anni hian civilian te nghaisa in human rights bawhchhiatna a thleng nasa hle tia sawi a ni bawk.
Bazoum hnuaiah Niger chu Western ally ni eng a ni a. US, France, Germany leh Italy te pawhin sipai an dahna a ni bawk.
Russian president Putin chuan Niger a constitutional order a awm theih nan ngenna a siam a, chutihlaiin Wagner chief Yecgeny Prigozhin chuan sipai tena thuneihna an chan chu lawmawm a tihthu a sawi ve thung.
Sipai tena thuneihna an chan hnuah Niger ah Russia thlawpna a nasa niin a lang a, junta thlawp tute chuan Russian flag te chu rally an neihna hrang hrangah vaiin, France chu inhnukdawk turin an ngiat bawk a.
Niger coup leader te chuan France nena military agreement an neih te chu an sut thu an sawi a, mahse, hei hi France chuan pawm lovin sipai sorkar mek chu an pawm lo an ti ve thung.