Niger sipai sorkar pawmloh thu sawi

West African leader-te chuan Niger sipai tena thuneihna an lak hnuah an vau zui ve nghal.
African leader te chuan Niger sipai tena an hren mek president Mohamed Bazoum chu ni sarih chhunga a dinhmun ngaia hlang let leh turin an hriattir.
A hmain Niger junta te chuan regional emaw Western powers tena Niger laka chetlakna nei lo turin vauna an lo chhakchhuak ve tawh bawk a.
Hetih lai hian capital Niamey a French embassy pawnah sorkar paihthlak thlawptute chuan lungawilohna an lantir ve bawk a.
West African nation bloc Ecowas leader te chuan Pathianni khan Nigeria capital Abuja-ah crisis talks neiin a hma lawka Mali leh Burkina Faso a civilian sorkar paihthlak chungchang pawh sawihona an nei bawk a.
Summit neih hnuah Ecowas te chuan thuchhuah siamin civilian sorkar paihthlak lakah ‘zero tolerance’ an kalpui bur thu an sawi nghal a.
Regional bloc te chuan karkhat chhunga an thilphut te tihhlawhtlin a nih loh chuan constitutional order kenkawh a nih theih nan hmalakna an neihzui tur thu an sawi bawk a.
“Hetianga hmalakna kalpui hian tharum pawh a keng tel mai thei,” tiin military chiefs te chuan inhmuhkhawmna nei nghalin ‘hmalak zui dan tur an ngaihtuah ang’ tiin a sawi.
Special Representative leh Head of the United Nations Office for West Africa leh Sahel te chuan meeting neiin Niger a thil thleng chuan hlet tha lo a chhuah theih avangin Ecowas chuan hma a la a ni, an ti.
“Niger hian firfiakna beihna kawngah hna pawimawh tak a thawk a. Niger-in hma a lak chhunzawm loha hun awl a pe a nih chuan helai region-ah hian firfiakna nasa zawkin a punlun thei a ni,” tiin Dr Leonardo Santos Simao chuan a sawi a.
Tun dinhmunah chuan Ecowas leh Niger military junta te inkarah official-a inbiakna engmah a la awm lo, a ti bawk a.
Ecowas te hian sipai chakna an hman hnuhnun ber chu kum 2017 khan niin khatih lai khan Senegalese sipai te chu Gambia-ah an roreltu Yahya Jammeh an inthlanah a chaklohna a pawm duh loh avanga a office atanga nawr chhuak tura tirh luh an ni.
Hetih lai hian Chad President Mahamat Idriss Deby Itno chuan Niamey ah ngei kalchilhin sipaite chu inhnukdawk turin a hrilh tiin Chad sorkar thuchhuah chuan a sawi bawk a. Niger-a civilian sorkar paihthlak a nih hnua foreign leader Niger tlawh hmasa bertu niin junta deputy leader Gen Salifou Mody nen inhmuhna an nei a ni.
Itno hian presidential guard unit, Niger new ruler anga inpuang Gen Abdourahmane Tchiani nena inbiakna an nei thei dawn nge dawn lo hriat a ni lo bawk.
West African leader-te hian Niger chung zawnah no-fly zone siam nghalin commercial flights tin te pawh thlawh phalloh niin land border tin an khar ping nghal vek bawk a, hei mai bakah hian junta te lakah financial sanction an kalpui nghal bawk.
Meeting an neih hma hian Gen Tchiani chuan Ecowas te leh hming hmerha sawi lovin Western nations te chu inhnamhnawih lo turin a vau thung a.
“Ecowas leh adveturer dang te kan hrilh duh chu kan ram humhim tur hian tumruhna thuk tak kan nei a ni,” tiin Gen Tchiani chuan a sawi a.
Niger-a sipai ten thuneihna an chan hian he ram French colony hlui hian Russia a hnaih hlauhna a lian hle a. Niger president paihthlak meka awm chu regional leh Western nation te nena militant Islamists te beihlet nana thawhhlawk tak a ni a.
Burkina Faso leh Mali te chuan an rama sipai sorkar pian hnuah Russia an hnaih tial tial bawk a. Niamey khawpuia French embassy pawna lungawilohna lantirnaah pawh “Long live Russia” tih te, “Long live Putin” tihte bakah “Down with France” tihte chu aurual nana hman a ni a. Emabssy compound wall te pawh an hal zui a ni.
Niger civilian sorkar paihthlak hi Western nations te chuan an dem hle a, mahse, Russia Wagner mercenary group Yevgeny prigozhin erawh chuan a thlawp thu a sawi thung a.
“Niger-a thil thleng hi eng dang mah ni lovin coloniser te laka Niger mipuite tawrhna pholanna a ni” tiin Wagner te Telegram channel-ah a tarlang.
Mali ramah chuan sipai sorkar te chuan Islamist militant te beih let nan Wagner te hi an ruai a. Nikum khan France chuan sipai sorkar te nena inmillohna avangin a sipai te a lo lachhuak tawh a ni.
Hei mai bakah hian Mali atang hian UN peacekeeper 12,000 te cuan kum sawm chuang islamist militants te an beih tawh hnuah an chhuahsan tawh bawk a ni.
Kar kalta Inrinni khan France chuan Niger hnena development aid leh budgetary support a pek zawng zawng chu a tihtawp vek thu a sawi a. European Union leh US te pawhin chutiang chuan hmalakna an kalpui bawk.