Nigeria in quarter-final an lut

On Jan 29, 2024 12 0

African Cup of Nations (Afcon) 2023 khelh mekah Inrinni zan khan last 16 khelh a ni a, Nigeria chuan si hnih faia Cameroon hnehin quarter-final an lut a. Angola pawhin Namibia an paltlang ve bawk.
South Africa khawmuala football ram lian pahnih; Nigeria leh Cameroon te hi Felix Houphouet-Boigny, Ivory Coast-ah quarter-final luh an inchuh a, inkhel hmuhnawm an lantir. He inkhel hmuhnawm takah hian Ademola Lookman goal hnih thun hmangin Nigeria in hnehna lian an sualchhuak a, quarter-final an lut.
England Under 21 team tana lo khel tawh Lookman hian Victor Osimhen siamsak atangin minute 36-naah hmahruaina goal a thun. Chawlhlawk hmaa goal a thun hmang hian hun rei tak chhung hma an hruai a, hun tawp dawn tepah an goal hnihna a thun belh leh. Minute 90-naah Bassey siamsak tha tak atangin Lookman hian an goal hnihna a thun zui leh a, an chakna a nem nghet. Hun tawp thlengin goal dang a luh belh thei tawh lova, Nigeria chuan Angola hmachhawn zui turin quarter-final an lut ta a ni.
Inrinni zana inkhel dangah Angola chuan an khingpui Namibia chu si thum faiin an hneh a, Nigeria hmachhawn turin quarter-final an lut.
Angola hian Namibia lakah bul an tan chhe viau a, minute 17-na lekah box pawnah a kuta ball a khawih vangin an si nghak Neblu hnawh-chhauh a ni a, tlem zawk an ni hma hle. Tlem zawk ni bawk mah se Angona hian an khingpuite an ngam zui viau tho thung teh tlat a, chawlhlawk hmain goal hnih ngawt an thun hman. Minute 38-naah Gelson Dala chuan Angola hmahruaina goal a thun a. Minute 40-naah Namibia si nghak Lubeni Haukongo hnawh-chhuah a ni ve thung a, team hnihte an inzat tawk leh ta chiah. Player 10 ve ve an nih atanga minute hnihna lekah Dala chuan Angola goal hnihna a thun zui leh a, si hnih faia hmahruai chungin chawlhlawk an hmang.
Chawlhlawk hnu lamah Angola an khel tha chhunzawm a, minute 66-naah Mabululu chuan an goal thumna a thun zui leh a, si thum faia hnehna changin quarter-final an lut zui ta a ni. Angola hian zirtawp zan khian quarter-final-ah Nigeria an hmachhawn zui leh ang.