Nikir thlaah ruah tui tam

Nikir thla (June) hi Mizoramah ruah tui tam thla a ni a, kum dang ang bawkin kuminah pawh ruah tui a tam. Kum dang aiin ruah tui hi a tam ti pawhin a sawi theih.
State Meteorological Centre-in an chhinchhiah danin kumin Nikir thlaah khan ruah tui hi mm 582.6 a tla a, ruah tui heti zat hi tam tham tak a ni.
State Meteorological Centre chhinchhiahna enin kum dang Nikir thlaah ruah tui hetiang zat hi a tla khat; 2017-ah mm 743.5, 1993-ah mm 638.6, 2003-ah mm 595.6, 2012-ah mm 505.5 a tla a, heng kum litea Nikir thla bak kum dang Nikir thlaah mm 500 a tling ngai lo.
Amaherawhchu, kumin Nikir thlaa ruah tui tlak dan hi, ruah sur buan buan ni tia sawi tur chu a awm meuh lo a, a tla tluang thung, ni tin ruah a sur a tih theih.
Nikir thla ni 1-ah khan mm 155 a tla a, hei hi cyclone tleh tura rin lai, ruah tam lai kha a ni. Ni 15-ah mm 72.6 a tla leh a, heng ni hnihte tih loh ni dangah chuan tam thama a sur chiam Tum a awm lo. Mahse, ni tin deuh thaw a tla thung a, ni 5, ni 7, ni 27, ni 28 leh ni 29-ah chauh khan ruah a sur lo. Ni dang zawngah chuan ruah a sur, tlem tal a tla zel.
Thla hmasa |omir thlaah khan ruah tui a tam bawk a, mm 620 a tla. Hei pawh hi thla tawp lam, sikul pawh khar a nih phah hialna, thlipui leh ruah a thawk dawn tih hun laia a tam vang kha a ni.
Tun hnai thla hnihah ruah tui a tam a, amaherawhchu, kuminah ruah tui a tlak har avangin khua a ro rei. Kumina ruah hmasa ber kha March ni 18-a mi a ni chauh a, chu pawh mm 1.8 chauh a ni. March thlaah a sur zui lo a, a sur deuh tak tak chu May thla chawhnu lam niin, tam thama a sur phei chu May thla tawp a ni.