Nipui tawp thawt ruala chawlh tum Kvitova

Nipui tawp thawt ruala
chawlh tum Kvitova
Double Wimbledon champion Petra Kvitova chuan tun nipui thawt lai tawp rual hian tennis chawlhsan ve tawh a tum thu a puang!
Czech player hian kum 2011 leh 2014 khan London khuaah ladies’ singles title la ve tawhin, 2019 Australian Open final a khel tawh bawk.
Kum 2016 khan a chenna in chhunga lut rukru misual hmanraw kengin a banah vitin, chu chuan a ban veilam tihrawl inthlunna tha/duar a thler a, a nerve a khawih bawk a, tennis inelna a hmachhawn theih tawh loh mai hlauhna a pian hman laiin khelmualah a kirleh a, mahse, Wimbledon-a a ropuina kha a pha thei tak tak ta chuang lo a ni.
Tunhnai kum liamta chhoah khan ranking lama a dinhmun pawh a hniam chak hler a, Grand Slam quarter-final a thlen hnuhnun ber pawh kum 2020 kha a ni daih tawh.
Nikum khan a fa hmasaber Petr a hrin avangin a chawl tluan a, kumin February thlaah a kirleh thei chauh a ni.
Khelmuala a kirlehna hmasaber chu Austin khawpuia ATX Open kha niin, a chak hmasakber nghakchhuak turin tournament panga a khelh tlin a ngai a, chu chu Rome khaw clay tournament-a Irina-Camelia Begu a hneh kha niin, Indian Wells, Miami, Madrid, French Open leh London tournament Queen’s Club Championships a khel bawk a, match sarih a khelhah vawikhat chiah kumin hian a la chak.
Chu chu a dinhmun a nih tak avangin X lamah kumin September thla US Open zawh lama tennis inelna chawlhsan ve tawh mai a tum thu a tarchhuak ve ta nge nge a ni.
Kvitova chuan a chawlh hun tur a puan rualin, “Pofessional tennis player ka ni ang tih hi ka suangtuah ngai lo kha a ni a, khawvel hrutchhuaka stadium mawi ber bera inkhelh hi ka mangphan ngai loh thil a nih laiin tun kum 19 liamta chhung khan chu hun chu ka tawngin, ka paltlang a, ka suangtuah phak loh ram ka lo kai a, mahse, he hringnun hi bung hrang hrang nei a nih miau avangin kei pawhin chapter thar ka kai a lo hun ve ta a ni.
The Championships, Wimbledon vawikhat tal han hmachhawn leh erawh ka duh a, ka phur em em bawk a, he hmun hi ka career ka chhuilet chang apianga ka hriat reng tawh tur leh vul kumkhua tawh tur a ni.
“New York khawpuia khelh mi US Open kaltlang hian hardcourt lama ka dinhmun hnuhnungte pawh han enchhin leh ka duh pah a,” tiin Flushing Meadows chu a tournament khelh tawpna tur a nih ve tawh tur thu a nemnghet.
World number two pawh lo ni ve tawh Czech player hi Nilainia Wimbledon wildcard an puan zingah non-British player awmchhun a ni.
Tarlan tawh angin, kum 35 mi ni ve tawh Kvitova hian naupai leh hrin avangin thla 15 zet chawlh a la a, nu ni chung chuan chet lak tak tak a harsat tak avangin chawlh lam a hawi ve ta a; a career-ah title 31 a la tling tawh.