NIRF ranking-ah Mizorama zirna in lang an tlahniam hret

NIRF ranking-ah Mizorama zirna in lang an tlahniam hret
Sawrkar laipui Ministry of Education chuan India rama university leh college tha a thlanna, ‘National Institutional Ranking Framework’ (NIRF) ranking tihchhuah thar berah Mizorama zirna in langte kum hmasa lam aiin an tlahniam hret a; hetihlai hian a vawikhatna atan Govt. Zirtiri Residential Science College a lang ve.
Sawrkar laipui Ministry of Education chuan India rama university leh college tha a thlanna, ‘National Institutional Ranking Framework’ (NIRF) ranking tihchhuah thar berah Pachhunga University College chu college category-ah 49-na a ni a, Mizoram University chu university category-ah 82-na a ni.
NIRF result hi Ningani khan New Delhi-ah Union minister for Education Dharmendra Pradhan chuan a puang a. Minister of state for Education Jayant Chaudhary pawh a tel. India rama university leh college tha thlan chhuah aiawh mi thahnem tak an tel a, PU College principal Prof H Lalthanzara leh MZU registrar Prof Lalnundanga te an tel a ni.
NIRF hi Ministry of Education-in India rama zirna in sang (higher educational institution) te inelna atana tehfung mumal tak hmanga a buatsaih a ni a. Kum 2015 atanga tan a ni a, kumin hi a kum 10-na a ni.
Pachhunga University College hi kum 2020 atang khan a tel tan a. Kum 2022 khan India ram college tha 45-na a ni a, 2023-ah 34-na, 2024-ah 35-na, kuminah 49-na a ni. India ram college 50000 chuang zingah kumin hian college 4030 an tel a, PUC tih loh chu India hmarchhak college zingah ranking 100 hnuailama lang pha an awm lo.
Kumin college category-a pakhatna chu Hindu College a ni a, pahnihna Miranda House niin pathumna Hans Raj College a ni.
Ranking tehna 2023- 2024 angin PUC-ah hian under graduate-ah zirlai 2761 an awm a, heng zingah hian state dang zirlai 45 leh India ram pawn zirlai 12 an awm. Post graduate-ah zirlai 88 an awm bawk. PUC-ah hian Arts, Science, Commerce leh Management stream-ah department 23 an awm mek.
University tehnaah Indian Institute of Science Bengaluru (Karnataka) chu pakhatna niin, Jawaharlal Nehru University pahnihna, Manipal Academy of Higher Education (Karnataka) chu pathumna a ni a. MZU hi 82-na a ni. Hmarchhak atangin top 100-ah university pathum dang an lang a. 33-naah Gauhati University Assam; Tezpur University Assam 79-na; Assam University Silchar 97-na a ni.
MZU hi kum 2022-ah 78-na, 2023-ah 76-na, 2024-ah 77 a ni a. Central university bikah kumah hian MZU hi 25-na a ni.
NIRF-2025 ah hian Govt. Zirtiri RSC chu 201-300 rank huangah a lang a, an vawikhat telna a ni. Mizoram sawrkar hnuaia awm college zinga tel hmasa ber a ni a. India ram puma college 4030 vel tel zingah an bul tanna chu a chhe lutuk loah an ngai tih an sawi.