Nirvana ‘Smells Like Teen Spirit’ MV-in 2B view kai

Nirvana ‘Smells Like Teen Spirit’ MV-in 2B view kai
Nirvana hla hit ‘Smells Like Teen Spirit’ music video chuan YouTube-ah vawi tluklehdingawn hnih a hlawh thei ta. He hla hi Nirvana larchhuahna niin, khawvelin Kurt Cobain leh a thiante a hmelhriat tan tak takna a ni.
‘Smells Like Teen Spirit’ hi 1991 a tihchhuah kha niin, a video hi Samuel Bayer direct a ni a, Nirvana singer leh guitarist ni bawk, chatuan ram pan ta Kurt Cobain leh a bandmate te high school gym a che vel te tihlan a ni a, 1991 kum chawhnu lama MTV-a tihchhuah a nih hnuah Nirvana chuan rimawi khawvel a al chhuak ta a ni.
YouTube a music video vawi tluklehdingawn hnih chin en hlawhthei tam zawk chu pop, Latin, country leh hip-hop artist, entirnan- Justin Bieber, Taylor Swift, Maroon 5, Katy Perry, Enrique Iglesias, Luis Fonsi leh Daddy Yankee, Adele, Ed Sheeran, Shakira leh Alan Walker tih velte an ni a, rock video hetiang zat en hlawh thei hi chu kut zungtang thliah tham lek tak tak a la awm.
Rock video YouTube-a vawi tluklehdingawn hnih chin en hlawh thei chu Twenty One Pilots ‘Stressed Out,’ leh ‘Heathens,’ Imagine Dragons ‘Believer’ leh ‘Thunder’, Guns N’ Roses ‘November Rain,’ leh Linkin Park ‘Numb’ te an ni.
Rock music lar vanglaiin tunlai angin social media a la chak lo va, internet te pawh mi nazawngin kan la hman tangkai theih hma leh, YouTube te pawh kan la hmelhriat hmalam te a ni tlangpui a, Twenty One Pilots leh Imagine Dragons te pawh hi 2009 leh 2008 vela rawn che tan an ni zawk a, rock rau rauah pawh an tharlam deuh zawk a ni.
Nirvana ‘Smells Like Teen Spirit’ video hi 1991-a an siam tawh ni mah se 2009 khan YouTube-ah an dah lut ve chauh a, kum 10 hnuah, 2019 khan vawi tluklehdingawn en a hlawh thei a, kum 6 chhungin tluklehdingawn dang en hlawh belhin, tunah chuan music video tana mellung pawimawh a thleng ve leh ta a ni.
YouTube-a music video vawi tluklehdingawn en hlawh thei neih hi zaithiam te tan mellung pawimawh a ni tawh a, an hla leh video lar dan tehna pakhat a tling tawh a, chutihrualin 2000 hmalama lar tawh te tan chuan he mellung hi thlen a sak talh tawh a ni.
‘Smells Like Teen Spirit’ hi November 1991 khan Billboard Hot 100-ah No.6 a kai a, chart lama Bryan Adams, Michael Bolton, Mariah Carey leh Boyz II Men ten chet that vanglai a Cobain, drummer Dave Grohl le bassist Krist Novoselic te rawn sapatal hi a dan a dang hle a ni.
He hla hian Nirvana studio album pahnihna ‘Nevermind’ chu rawn vawrh sangin, khatih laia chart lama roreltu Michael Jackson ‘Dangerous’ album chu Billboard 200 (albums) chart a No.1 atangin an rawn nawr sawn a, January 1992-ah Nirvana chuan Billboard 200 chart-a No.1 kai thei album an neih phah ta a ni.