Nitin apple pum hnih eiin lung natna risk tihniam thei
Florida State University a mithiam rualin zirchianna an neihah chuan, hmeichhiate an thi a hul hnuah hian heart attack leh stroke risk a sang sawt thin niin an sawi a, chutiang hunah chuan apple hian thisena thau awm te titlemin hmeichhe tan heart attack leh stroke risk te a tihniam thei niin an sawi a, thlaruk chhung nitin apple pum hnih ei ziah hian cholesterol level chu 50% in a tlahniam thei niin an sawi bawk a ni.
Cholesterol-ah pawh a tha lo chi an tih bik, thisenzam vela thau bawh kan tih ang chi, nunna atana hlauawm khawpa lung leh thluak bula clot (thisen khang) siam thei low density lipoprotein a tihniam nasa ber a ni.
Heart attack leh stroke hi khawvel pum huapa hmeichhe thihul tawh ten an thihpui tam ber pawl niin an sawi a, an thihul hma chuan lung natna laka invenna khuanu duan sa (natural immunity) an nei a, mipa aiin lung lam natna pawh a let hnihin an nei tlem zawk. Mahse, an thi a lo hul hnu, kum 50 vel bawr atangin heart attack leh stroke risk hi a sang chak ta hle a ni.
Zirchianna neitu hian hmeichhe 160, thihul tawhah enchhinna neiin, a chanve te chu apple tih ro (dried apple) gram 75 nitin an ei tir a, chu chu apple hring liantha pangngai (medium-sized) pum hnih nen a intluk vel niin an sawi.
A chanve dang chu prune (dried plum) gran 75 bawk an eitir ve thung a, thla thum dan zelah an thisen test zelin, chutiang chuan kum khat chhung an enkawl a ni.
Chuta tanga an hmuh dan chuan apple ei group te chu thla thum hnuah an cholesterol level 9%-in a tlahniam nghal a, an LDL cholesterol pawh 16%-in a tlahniam nghal bawk.
Thla ruk hnuah pawh apple ei group te chu an cholesterol level 13%-in a tlahniam leh a, LDL pawh 24% in a tlahniam a, mahse, a hnu leh thla ruk dangah chuan a tlakhniam belh tawh lo.
Prunes pawhin cholesterol level chu a tihniam ve deuh ngei a, mahse, apple ang em chuan a tihniam ve lo.
He result atang hian nitin apple pum hnih thlaruk chhung ei ziah chuan lung lam natna hrang hrang, heart attack leh stroke risk a tihniam tiin thutlukna an siam ta a ni.
He zirchianna chungchang hi Journal of the Academy of Nutrition and Dietetics-ah tarlan a ni.