Nitin mamawh harsatna thleng lo turin Supply minister-in hma a la
Kawng chhiat avanga nitin mamawh chawkluh kawnga harsatna a awm lohna turin Supply minister B Lalchhanzova chuan hma a la zel.
Zirtawpni khan FCS&CA minister hian department hotute leh Mizorama LPG distributor te a kokhawm a. Tunlaia eirawngbawlna gas dinhmun sawiho a ni.
Minister chuan Mizoram chak lakna kawnga harsatna tawh mek laia eirawngbawlna gas-ah harsatna lian lutuk awm lo tura theihtawp chhuahtu Supply department hotute, Indian Oil Corporation hotute leh Mizoram LPG distributor-te chungah lawmthu a sawi a. Theitawp chhuaha tan la chhunzawm turin a chah.
Report danin, mipuiin eirawngbawlna gas pekchhuah kawngah harsatna liantham a la awm lo a. Rawtna an siam angin, Mizoramin hnianghnar taka eirawngbawlna gas a hmuh zel theih nan IOC Limited hotute hnenah FCS&CA chuan lehkha a thawn a ni.
FCS&CA minister hian Ningani khan Kawnpui daia kawng bal avanga nitin mamawh tangkhangte phurhluh dan ngaihtuahin a hmunah a tlawh a. Mipui nitin mamawh mumal taka phurh tlang a nih theih nan Kawnpui Police Station-ah khawtlang hruaitute, PWD hotute leh Kolasib District Truck Owners’ Association ten nen an sawiho a ni.
Minister chuan chatlak loa nitin mamawh phurhluh a nih zel theih nan sawrkarin hma a la tih sawiin, chiai lo turin mipui a chah.