Non Lapsable Central Pool of Resources (NLCPR) Fund hmanga Chakma Autonomous District Council hnuaia hmasawnna hna thawhna tur tichingpentu chief executive member hlui Kali Kumar Tongchangya chu court-in kum 4 lung in tang tur leh cheng nuai 4 chawi turin a hrem.Kum 2009 atanga 2013 chhunga NLCPR Fund hnuaia Longpuighat leh Kukurduleya khaw inkar kawng siamna atan instalment thuma sum lokal, a vaia Rs. 179,03,773 chu a hmanna tur ang ni loah tam tak hman a ni tih hmuhchhuah a ni a. Sum chingpen hi hetihlaia ruling party office mamawh atan te, ruling party mamawh atan bakah MDC inthlana ruling candidate 19 ho mamawh atante hman a ni. Longpuighat leh Kukurduleya inkar kawngpui siam hi sum tih chingpen avang hian tun thlengin thawh zawh a la ni lo tih sawi a ni bawk.
He thubuai hi Prevention of Corruption Act special judge Dr HTC Lalrinchhana chuan a ngaihtuah a. Thuhretu hrang hrang thusawi leh Anti Corruption Bureau thil mante buk a nih hnu ah, court hian hetihlaia sum lachhuaktu bera puh CADC CEM Kali Kumar Tongchangya, Kamalanagar-III, Lawngtlai district hi thiam loh a chantir a. Hemi hnuaia sum chheprelh Rs. 1,26,00,000 hmuh let pawh sawrkar sumbawma dah nghal tura court-in a tih angin Thawhlehni khan dahluh a ni.
Thiam loh chantir tawh Kali Kumar Tongchangya hi court hian Thawhlehni khan hremna a tichhuak a. Thubuai pahniha thiam loh a chantirna hi kum 4 lung in tan leh sumfai cheng nuai hnih chawi ve ve na tur a ni a, sum a pe thei lo a nih chuan kum khat dang tan belh turin a ti ve ve bawk. Amah hi hetiang lama thubuai nei leh thiam loh chantir tawh a la nih loh avang leh, chhungkaw eizawngtu ber a nih avangin, thubuai pahnih hi lakawpin a tan hun tur hi kum 4-ah a tihsak a, a sum chawi tur erawh a hrang ve vea kaltirin, nuai 4 a chawi anga, sumfai chawi tur hi a pe thei lo a nih chuan, thubuai pahnih lakhawp tho in kum khat dang a tan belh ang.
NLCPR sum tichingpentu MADC CEM hlui kum 4 tang turin hrem
Get real time updates directly on you device, subscribe now.
Next Post