No Vehicle Day huna lirthei chet theih dan

No Vehicle Day huna lirthei chet theih dan
Coordination Committee on Traffic Management-in a rel angin, kumin Krismas leh kumthar vuakvetah Aizawl khawpui chhunga mipui, kea bazar kalte him zawkna atan December 23, 24 leh 31-ah lirthei tlan theih lohna lai – No Vehicle Day hman tur a ni a. Hetiang hian SP Traffic Aizawl chuan No Vehicle Zone leh lirthei tlan dan tur a ruahman.
Chanmari leh Zodin Square inkarah chawhma dar 10.30 atanga tlai dar 4.30 chhungin lirthei eng mah (thirsakawr leh nawrlirh huamin) tlan phal a ni lo a. Hei hian emergency duty bakah natna avanga damdawi in pante a huam lo.
Civil Hospital atanga lirthei chhuak chu Hospital Road atanga Bazar Bungkawn lama tlan thlain Saron Veng lama kal tur a ni.
No Vehicle Zone-in a huam china taxi stand chu AR Mandir ep parking area-ah sawn a ni.
‘No Vehicle Day’ chhung hian Chanmari leh Zodin Square inkarah lirthei engmah dah phal a ni lo.
No Vehicle Zone huamchhungah chhim leh hmar inkalpawhna kawngpui (main road) khar a nih dawn avangin a helna tura ruahman kawngpui dungah traffic jam avanga harsatna a thlen lohnan bungrua leh lirthei engmah dah phal a ni lo a. No Vehicle Zone hela lirthei tlan dan tur chu-
Lirthei hmar lam panten Zodin Square an pel thei loanga; tlak lamah: Temple Square atangin Vaivakawn lama kalin Chanmari West lama chhoh emaw Company Peng lama chhukin emaw hmar lam pan theih a ni. Chhuah lamah Sikulpuikawn atanga Ramhlun Road via Republic Veng- College Veng- Bethlehem Veng- Chhinga Veng- Electric Veng lama kal theih a ni.
Treasury Square atangin Electric Veng via Republic Veng- College Veng– Bethlehem Veng– Chhinga Veng lamah a kal theih a.Tuithiang peng, Chhinga Venga Sapdengi in bul atangin chho zawngin tlan phal a ni lo.
Lirthei chhim lam panten Chanmari Bus Stand leh Hrangbana College an pel thei loanga, Chanmari kawn atangin Lower Chanmari, Lower Zarkawt lama kal phal a ni lo.
Heng kawngah hian kal theih a ni – Chanmari Presbyterian biak in atanga Vaivakawn Road via Kawipui Chanmari West. Bawngkawn atanga ITI Road via Ramhlun, Electric Veng adt.
Lirthei reng reng Bazar Bungkawnah chhuah chhoh phal a ni loa, Modern High School bulah kual thlain Saron Veng/ Chhinga Veng lamah an let ang.
No Vehicle Zone helna kawngin a paltlang local council-in traffic jam avanga mipuiin harsatna an tawh lohnan theihtawp chhuahpui a, kawngpui dunga lirthei leh bungrua dah hnawk a awm lohnan vengchhung information centre atanga puanzar sak tura ngen leh beisei an ni tih a sawi.
Dropping leh pick up-ah heng kawng tarlanah hian dropping leh pick-up tur ringawtin lirthei a lutin a chhuak thei –
Hmar lamah: Chanmari biak in helin hmar lamah an kual let ang. Chhim lamah Zodin Square atangin Canteen Kualah, AR Mandir helin chhim lamah kual let tur a ni.
Lirthei dah theihna chin chu, hmar lamah two wheeler leh LMV tan High Field Zarkawt-ah parking ruahman a ni a. Two wheeler tan – Govt. Mizo HSS Commerce Department gate bulah; Govt. Mizo High School compound leh Govt. Mizo High School Multi Level parking hnuai ber. Chhim lamah two wheeler tan – DC office peng atanga SP Aizawl office peng inkar; Dak Inpui leh Supply department office kawt.
Two wheeler leh LMV tan hengah hian parking ruahman a ni – Aizawl South Treasury office kawt, Planning office kawt, Aijal Club Park kawt kawngpui dung.
Hengah hian kawngpui dala lirthei dah phal a ni lo – Temple Square to Vaivakawn road, Vaivakawn Hunthar peng to Company peng leh Vaivakawn atanga Chanmari Traffic Point via Chanmari West. Bawngkawn to Sikulpuikawn via Ramhlun North – Ramhlun South – Aizawl Venglai – Electric – Chhinga Veng – Saron Veng – Tuithiang Veng – Bethlehem Veng – College Veng – Republic Veng – Upper Republic/Treasury Square. Armed Veng to Chhinga Veng Road Sapdengi in bul thleng; Ramthar Sihpui to Chhinga Veng via Electric Veng.
Heng ruahmanna hian chhiatrupna thil, kangmei leh emergency pawimawh bika duty, dan leh thupek pawimawh bika police leh magistrate duty-te chetvelna a huam dawn lo a ni.