North Korea-in missile enchhin leh tawh
South Korea military-te chuan North Korea chuan February 2 khan khawthlang tuipui kamah cruise missile a kapchhuak leh tawh tiin a sawi a. United States, South Korea leh Japan-te nena an boruak sosang zelah North chuan a runluih zui zel a ni.
Missile a kahchhuah hma lawkin North Korean leader Kim Jong Un chuan a naval force-te chak zawka thuam tur tiin amah ngeiin warship-te tlawhin a fang a ni.
South Korea Joint Chiefs of Staff chuan US leh South Korean military-te chuan missile kahchhuahna hmun chu an analyse mek thu sawiin kum 2024 chhunga North Korea in cruise missile pali a kahchhuahna a ni tawh a. Missile engzah nge kahchhuah a nih leh engtia thui nge an thlawh tih erawh hriat theih a la ni lo.
Kim Jong Un-an Nampho a tlawh leh January thlaa ralthuam hrang hrang a pholan zui bawk chuan boruak a titang hle a, tun hnaia a ralthuam test zingah submarine atanga kahchhuah theih cruise missile thar pawh a tel a ni.
Kim chuan tun hnaiah a tum ber chu nuclear-armed navy neih a nih thu sawiin, chu chu United States, South Korea leh Japan inluling mek zelah tihmakmawh a ni tiin a sawi bawk.
Kim chuan tun hnaia naval force-te a tlawhnaah pawh naval force tihchak chu a pawimawh ber tia sawiin, maritime sovereignty humhim nana pawimawh chungchuang tiin a sawi niin North Korea official Korean Central News Agency chuan a tarlang.
KCNA chuan Nampho-ah hian eng warship chi ber nge sak mek a nih a tarlang lo va, mahse kum nga chhung kalpui tawh a ni thung.
North Korea hian tun hnai lawkah pawh US mainland kap thleng pha intercontinental ballistic missile Hwasong-18 chu hlawhtling takin a lo enchhin tawh bawk a. January 14 pawh khan solid-fuel intermediate-range missile Pacific a US base-te kap pha chu a lo test tawh bawk.
Kim Jong Un-an ralthuam lama nasa taka hma a lak zui zel hnuah Korean Peninsula boruak chu hun dang zawng aiin a tang mek a. United States, South Korea leh Japan-te chu beihah a vau reng bawk a. US leh Asian allies-te chuan chhanlet nan military exercise an nei chamchi ve reng bawk.