Novak Djokovic a chak, Medvedev a tla

French Open 2025 khelh mekah Thawhlehni zan Grand Slam-a vawi 24 champion tawh Novak Djokovic chuan hnehnain bul a tan. Djokovic a chak lai hian champion tura rinkai zinga mi Daniil Medvedev erawh chu Cameron Norrie paltlang zo lovin a tla a, French Open 2025-a a zin kawng a zawh tawp nghal thung.
Geneva Open-ah champion a Title 100 la tling hlimhlawl Novak Djokovic hian French Open 2025 bul a tannaah Mackenzie McDonald a hmachhawn. Mackenzie lakah hian harsatna lian tawk lovin a chak a, French Open a hmachhawn tawh vawi 21-ah first round paltlang zawh loh a la nei lova, second round a la lut vek. Nole hian second round ah Clement Tabur hnehtu Corentin Moutet a hmachhawn zui leh ang.
Rolland Garros-a vawi hnih champion tawh Djokovic hian World No 98 Mackenzie McDonald lakah bul a tan tha a, set khatnaah game thum chauh hloh chungin set a la. Set hnihna leh set thumnaah pawh game thum ve ve hloh chungin set a la zawn leh a, 6-3, 6-3, 6-3 a hnehna changin second round a inhlangkai ta a ni.
Tennis player ropui ber Novak Djokovic hian Grand Slam-ah vawi 25 champion tlin tumin hma lam a pan a, kum 2025 chhunga a tum a tihlawhtling thei a nih chuan kum 38 mi lai a nih tawh vang leh kum naupang zawk, player tha tak tak an chhuah thar ve zel bawk vangin Tennis a chawlhsan rinna lian tak a awm. Hma lam hun chiang lo taka a awm reng vangin French Open-ah khelh mekah hian ngaihven a hlawh leh zual dawn a. Tun hi Rolland Garros-a a inlan hnuhnung ber ni thei dinhmunah a ding.
Djokovic a chak lai hian champion tura rinkai zinga mi Daniil Medvedev chu first round paltlang zo lovin a tla ve thung. Grand Slam champion hlui Medvedev hian Cameron Norrie a hmachhawn a, mak tak maiin tlawk zawkah a tang.
Hun rei tak chhung top 10 player laka hnehna chang thei tawh lo Norrie hian Medvedev-a lakah beisei phak baka thain bul a tan. Break pawimawh tak a neih vangin Norrie hian set khatna a la. Set la hmasa zawk a nih vangin a phur zui viau a, set hnihnaah tha zual zawkin a inlan chhunzawm a, awlsam zawkin set a la nawn leh a, inlehthalna lian thlentir a hnaih leh zual sauh.
Set hnih hloh zawna tlak a hnaih viau laiin Medvedev a insiam tha a, set hnih a la zawn ve leh a, inkhel hmuhnawm zawk an lantir. Set hnih ve ve an lak hnuin deciding set-ah an inhnehtawk zui leh viau. Deciding set-ah game an inlak chhawk zak zak hnuin Norrie a che fuh nawn leh a, break pawimaw tak a neih chhawr tangkaiin set pawimawh tak a la a. Seed no 11 Daniil Medvedev lakah hian 7-5 6-3 4-6 1-6 leh 7-5 in hnehna a chang nawlh a, second round a lut. Djokovic a chak zel a, Norrie a chak zel a nih bawk chuan Geneva Open-a inhmachhawn pahnihte hi fourth round-ah an inhmachhawn thei dawn.
Thawhlehni a inkhel dangah Alexander Zverev chuan a khingpui Learner Tien chu 6-3 6-3 leh 6-4 a hnehin second round a lut a. Britain’s world number five Jack Draper chua set a hloh hmasak zet hnuin Mattia Bellucci lakah 3-6 6-1 6-4 leh 6-2 in hnehna a chang let ve bawk.
French Open : Grand Slam pali zingah Clay Court a khelh awmchhun French Open hi kum 1891 daih tawh khan inelna neih tan a ni a, kum 1925 atang khan Grand Slam-ah telh tan a ni. Kum 1928 atang khan tuna an khelhna Stade Roland Garros-ah hian khel tan a ni. May thla chawhnu lamah khelh tan niin, June thla tir lama zawh fel thin a ni. ‘Roland Garros’ tia hriat lar ni bawk French Open-ah hian vawi 14 zet champion tawh Rafael Nadal chu mipa lamah champion ngun ber a ni a, hmeichhe lamah vawi sarih champion tawh Chris Evert chu champion ngun ber a ni ve thung.