Mizo film industry-a a sulsutu leh mizote bung
thar min kai puitu Mapuia Chongthu, Leitlang Pictures kutchhuak Ambush film chu October ni 5 hian MZU Auditorium-ah tlangzarh a ni dawn.
-- Advertisement --
The Aizawl Post zawhna chhangin Mapuia Chongthu chuan he film hi mizote’n zalenna an beih dan tlawh chhan a siam a nih thu sawiin, he film siam nan hian cheng nuai 30 vel an sen thu a sawi a. Mizo film a siam tawh zing a budget san ber na a nih bakah mihring lan tam berna a nih thu sawiin, mihring 200 chuang zet an lan thu leh chung zinga 70 chuang chu role pawimawh leh langsar zual an nih thu a sawi a.
Ambush film shoot hma hian MNF leh India sipai a tang tur changtu zawng zawng ten arms training leh gorilla warfare nungchang zirin ni engemawzat training an nei vek tih a sawi a. He film hi thla thum chhung ngawrh taka a shoot thu sawiin, Serchhip khaw hlui Bawngchawm hmun ah khua din chawp in shooting an nei tih a sawi a. Hei bakah hian Thenzawl khaw dai Vety complex leh Lunglei hming put chhan Nghasih bula raltlan camp ah te sipai hmun tur siam chawp in shooting an neih thu a sawi a.
Shooting chhung zawng hian heng shooting na hmun te hian mi 70 chuangin riahchilhin an shoot ani.He film hi MNF sipai te thlirdan emaw central lamin kan rambuai an rawn hmuhdan nilovin atak a,rambuai hunlai tawng pha chin mi hrang hrang an kawm kual hnuah leh research tamtak data collect khawm leh tlang hrang hrang atanga thlir kual a mizote’n zalenna an sual dan leh mipuiin an tawrhdan behchhan a siam a nih thu a sawi bawk.
Mapuia Chongthu chuan mizo film industry a hmasawnna tam tak hmuh tur a awm chu lawmawm a tih thu leh film siam thiam mithar tam tak an rawn chhuak chu lawmawm a tih thu a sawi a. Ambush film hi mizoram mai ni lo rawn pawn thlenga en theih tura chhawp chhuah an ruahman leh dawr an nih mek laiin, India sipai te rawng taka an chetna a tam deuh avangin an thil tum chu a hlawhtlin beisei awmloh thu a sawi a. Film thar an butsaih leh hunah chuan ram pawn thleng a en theih turin Netflix, Amazon Prime, Jio Cinema adt. velah dah ngei an tum tawh thu a sawi bawk.
Ambush film-ah hian Director Mapuia Chongthu kan hmu tel dawn a, a changtupa tur hi Sangtea Chhangte niin, a changtunu tur hi Marilyn Chhanchhani a ni dawn a. Gilbert Colney, Sena Ngente, Lalrina Chawngthu, R. Lalnuntluanga, Rinmawia, Michael Juda Sanga, Duati Ralte, Lalzawmsanga leh Eddie Tochhawng te bakah actors that taktak leh experiance nei tha hrang hrang an in lan a ni.
Director : Mapuia Chongthu
Script writer : Dr. Zarzosanga
Screen play : Nuna Hrahsel
Production : Leitlang Pictures