Ningani zinga NBA khelhah Phildelphia 76 ers in Minnesota Timberwolves an hneh tumin Joel Embiid chuan point 51 zet hnuah NBA a point 30 chin thawkchhuak zawn rei ber record thar a siam.
Philadelphia 76ers hian an khingpui Minnesota Timberwolves lakah bul an tan tha a, quarter khatnaah point liin an sang zawk. Quarter hnihnaah an inhnehtawk viau a, point 36 ve ve thawkchhuakin, inkhel hmuhnawm zawk an lantir a, point li a hmahruai chungin 76ers in chawlhlawk an hmang.
Chawlhlawk hnu lamah an inhnehtawk zui leh viau a, quarter thumnaah point khatin Timberwolves an chungnung ve thung. Timberwolves hi chak theih beiseina sang tak nen inlan bawk mah se quarter hnuhnung berah point 11 zetin an hnufual ta thung a, an khingpui 76ers lakah point 127-113 in an tlawm zui ta a ni.
Minnesota Timberwolves an hneh tum hian Philadelphia 76ers tan MVP ni mek Joel Embiid chuan point 51 lai a thawkchhuak a. Season kal meka point a thawhchhuah hnem ber tum hian ball sawhlet vawi 12 a dawng tling bawk. Embiid hian season kal meka NBA-ah game 12 chhung zet point 30 chin chunglam a thawkchhuak zawn tawh a. Kum 51 zet hnuah NBA a point 30 chin thawkchhuak zawn rei ber niin, record duhawm tak a siam. NBA-ah hian point 30 thawkchhuak zawn rei ber chu Kareem Abdul-Jabbar a ni a. Ani hian kum 1972 khan Milwaukee Bucks tan game 16 chhung zet chu a zawnin point 30 chin a lo thawkchhuak zawn tawh.
Timberwolves an hneh vangin Philadelphia 76ers hi Eastern Conference-ah pathumnaah an inhlangkai a. Game nga chhunga an tlawm vawi khatna tawng mah se Timberwolves hian West Conference lamah hma an hruai chhunzawm zel thung.
Ningani zinga inkhel dangah Boston Celtics chuan an khingpui Sacramento Kings chu point 144-119 in an sawp a, Eastern Conference table chung berah an inhlangkai.
oel Embiid a vul
Get real time updates directly on you device, subscribe now.
Prev Post
Next Post