Office dan titawp lailawk

Kolasib Auto Rickshaw Drivers’ Union (KARDU) in Kolasib khawchhunga auto rickshaw permit 112 pek thar turah lungawilohna lantira District Transport Office staff-te hnathawk thei loa an dan chu Kolasib bawrhsap John LT Sanga’n an duh ang tihhlawhtlin a nih theihnan bawhzui a tiam vangin September 1 tlai dar 4.30 khan lungawilohna lantir hi an titawp lailawk.
KARDU hruaitute sawi danin, an thilphut ber ‘permit pek tur zawng zawng cancel vek’ tih chu an dinna a la nih reng a, bawrhsap hnenah hian an thlen. Bawrhsap chuan KARDU thilphut hi ama thuneihna niloin, secretariat lama thlen tur chi a ni, tiin, hma a lak dawn thu leh Kolasib DTO staff an dan chu chawlhsan turin a ngen a ni.
Bawrhsap ngenna hi KARDU hian Zirtawpni khan ngaihtuahin, secretariat a dawrna turah kar khat – September 4-8 nghah nise, hemi chhunga an thilphut a hlawhtlin loh chuan an kal zel dan tur la ngaihtuah leh nise an ti.
Tarlan tawh angin State Transport Authority chuan Mizoram hmun hrang hrang atan passenger phur chi lirthei permit pekchhuah a tum a. Kolasib khawchhung atan auto rickshaw 112, two wheeler taxi 93 leh taxi 43 bakah bus permit 2 pek turin ruahman a ni. Permit hi pekchhuah la ni lo mah se, a hmu turte erawh hriat vek tawh an ni a, heng mite hi STA chuan DTO kaltlangin permit dilna siam turin a hriattir tawh.
KARDU chuan auto rickshaw permit hmu tur zingah hian eizawnna atana mamawh lo, sawrkar hna nei 12, unaua dawng 3, pafaa dawng 2, auto rickshaw nei lai 10, nikuma hmu tawh kumina hmu nawn leh 20 bakah permit hralh tum engemaw zat an awm niin an sawi a, tuna permit pek turte hian nei vek se, eizawnna atana hmangtuten passenger phurh tur nei loin harsatna an tawk thei dawn niin an sawi.