Official takin Taylor Swift a billionaire ta

Forbes-in Taylor Swift chu billionaire a ni tih an puang ta a, a hausakna hi dollar tluklehdingawn 1.1 angin an chhut. Tunah chuan official takin Taylor Swift hi billionaire a tih theih ta a, Swift hian record siamin, sumdawnna dang tel lo, rimawi kaihhnawih ngawr ngawr atanga billionaire ni thei hmasa ber niin Forbes chuan an tarlang.
Forbes-in World’s Billionaires List an tihchhuah tharah Swift hming hi a vawi khat nan a lang ve ta a, a hausakna pawh dollar tluklehdingawn 1.1 anga chhut a ni. A sum hmuhna hi a album leh hla hralhna bakah Eras Tour atanga a sum lakluh leh a music catalog hlutna leh a real estate portfolio te nena chhut a ni.
Billionaire list a lang thar zingah hian Earvin ‘Magic’ Johnson leh Christian Louboutin te pawh newcomer an ni. He list-a No.1 chu Nernard Arnault niin, ani hi LVMH empire hnuaia fashion leh cosmetic brand 75 zet atanga inchhek vûm niin, a brand zingah hian Louis Vuitton leh Sephora te pawh a tel. Forbes chuan Arnault hi hausa berah an puang a, Elon Musk, Jeff Bezos, Mark Zuckerberg, Larry Ellison, Warren Buffett, Bill Gates, Steve Ballmer, Mukesh Ambani leh Larry Page te pawh top 10-ah an lang.
Taylor Swift hi nikum atang khan billionaire anga sawi a lo ni tawh a, Billboard pawhin music sales, royalties, concert ticket leh concert-naa merchandise hralhna bakah movie ticket hralhna atangin dollar tluklehdingawn 1.82 thawk chhuak angin an chhut a. The Eras Tour atang ringawt pawhin 2023-ah khan dollar maktaduai 900 chu hmu turin an chhut. Hei hi vawi 53 concert a neihah ticket maktaduai 3.3 hralhna angin an chut a ni. Mahse, Billboard-in an chhut hi chhiah a chawi hma te, a hnuaia thawkte hlawh a pek hma te a a hmuh zawng zawng angin an chhut a ni.