Olympic 100m gold awrhtu Alfred

Olympic 100m gold awrhtu Alfred
Olympic Games-a mite ngaihven hlawh zinga mi 100m intlansiak hmeichhe final-ah Inrinni khan Julien Alfred a chak ber a, Paris 2024-ah women’s 100 metres title hlawhchhuakin, Caribbean thliarkar khawchhak lam ram tenau Saint Lucia ram tana Olympic medallist hmasaber a ni.
Stade de France-ah kum 23 mi Alfred hian fal takin final a thutnun a, an ram national record khumin heti zata thui tlankawng hi second 10.72 chhungin a zo a; American world champion Sha’Carri Richardson (10.87) kutah silver medal lutin, a chipui Melissa Jefferson (10.92) chu pathumna a ni.
Great Britain nula Daryll Neita chuan second 10.96 hmangin bronze a awrh pha lo chiah chiah a, palina a ni.
Lawmman semna dawhsan luah pha lo mah se Neita hi kum 64 chhunga Olympic sprint final-a British female athlete chetha ber a ni tho a, 200m hmachhawn tur a la nei a, nimin khan eng dinhmunah nge a din tarlan hman a ni ta lo.
Neita British team-mate pahnih Dina Asher-Smith leh Imani-Lara Lansiquot-te chuan 100m final an thleng zo lo a; Jamaican sprint icon Shelly-Ann Fraser-Pryce pawh he competition atang hian semi-final tlan hma lawk khan a inhnukdawk a, champion ta Julien Alfred tan pressure a tlem phah tura ngaih a ni.
Kum 37-a upa Fraser-Pryce tan kumin hi Games-a a inlan tawpna tur a ni ve tawh a, a hun hnuhnungah Olympic 100m gold medal pahnih a awrh tawh belhchhah turin Inrinni khan Olympic 100m semi-final a lut a, mahse, a zawna Olympic Games vawinga a telnaah Inrinni khan semi-final tlan hman lo tawkin a inhnukdawk ta a ni.
Jamaica’s women’s 4x100m team-a member langsar Shelly-Ann Fraser-Pryce hian khawvel huap medal 24 la tling tawhin, kum thum kalta khan Tokyo Games-ah ram tan women’s 4x100m team gold a hlawhchhuak a, vawinga ngawt 100m world champion a ni tawh bawk.
100m intlansiak bikah Olympic gold pahnih a awrh tawh belhchhah thei ta lo mah se women’s 4x100m team inelna lamah he thu buatsaih lai thleng hi chuan 100m history-a tlanchak pathumna Fraser-Pryce hian Jamaica tan medal beisei tur a la nei.
Tarlan tak angin, Alfred kuta Paris Olympic 100m gold a luh hma zawng khan kum 2022 chhiarpuia mihring nuai khat leh singriat vel lek chenna North America khawmualpui ram pakhat St Lucia hian Olympic Games hnuhnung pasarihah infiammi tir ve tawh mah se medal lawm tur an la nei ngai lo a, an kawlpui chu Alfred hmangin an khengthlawn ta a ni.
Khawvel huap outdoor title a lak vawikhatnaah Alfred a hlim hle rualin kum 2013-a mual liam ta a pa leh Pathian a ngaihtuahchhuak tih a sawi a, “Pathian leh min hmu ve thei tawh lo ka pa kha ka rilruah an rawn lang ngal a; ka pa, he hlawhtlinna hi i tan ka hlan a, ka ngai hle mai che. I tana ka tih a ni a, nangmah bakah ka coach leh Pathian vang a ni,” a ti.
Alfred hian kuminah world indoor 60m gold awrhin, St Lucia atanga he title la thei hmasaber a lo ni taw bawk.
2022 Commonwealth Games silver medallist hian kuminah hma a sawn hle a, kumin June thla khan 100m intlansiakah mimala a tlan that ber leh national record siamin second 10.78 a hmang a; thla hmasa London-ah khan 200m-ah a tlan fuh ber tawngin second 21.86 a hmang bawk.
Paris Games hma hian coach Edrick Floreal hnuaiah Austin, Texas-ah training a kalpui a, tah hian hmeichhe intlansiak khawvela mi langsar Asher-Smith nen an train ho nghe nghe.
2023 World Championships-ah khan Alfred hian 100m leh 200m race-ah final thleng ve ve mah se medal a awrh zo lo ve ve a, tlankawng tawi zawkah hian pangani niin, a thui zawkah palina a ni pha chauh.
Jamaican sprint king Usain Bolt chu phurna leh thathona petu a nih thu Paris 2024 women’s 100m title latu Alfred hian hnehna a chan hnuah a sawi.