Opposition leader ten Nitish Kumar sel nasa hle

Opposition leader te chuan Bihar Chief Minister Nitish Kumar an National Democratic Alliance (NDA) a zawm sanah BJP te chu mawhphurtu an ti a. Samajwadi Party president Akhilesh Yadav chuan ruling party chu Prime Ministerial candidate ni thei chu Chief Minister chair luah lekah khapbet tiin a sawi.
“Lok Sabha inthlan turah BJP te chu an beidawng a ni. Nitish Kumar an lakluh hian Prime Minister pawh ni thei chu Chief Minister post-ah an tlakhniam tir a ni. BJP-te chuan Bihar mipuite mai bakah an duhthlanna a hmusit a ni” tiin Yadav chuan a sawi.
Congress-te chuan Nitish Kumar chu political opportunism ringawt atchilha ‘laiking ang maia rawng thlak thin’ tia sawiin Party president Mallikarjun Kharge chuan kan ramah ‘Aaya Ram-Gaya (turncoats) an thahnem hle’ tiin a sawi a.

Inlungrual
Kharge chuan Rashtriya Janata Dal (RJD) leader Lalu Prasad leh Bihar Deputy Chief Minister hlui Tejashwi Yadav te chuan a hma daihin Nitish Kumar-an Indian National Developmental, Inclusive Alliance (INDIA) chhuahsan a tum thu an hrilh lawk tawh tiin a sawi.
“Ni nga kalta khan Lalu Prasad leh Tejashwi Yadav te chuan Nitish-an INDIA bloc chhuahsana NDA a let leh a tum dan min hrilh tawh a. INDIA alliance unity ngaihtuahin kan sawi chhuak duh lo mai mai a ni. Nitish-an chhuah a tum tlat chuan tumahin kan dang thei lo” tiin Congress president chuan a sawi a. INDIA partner dangte nena seat-sharing dan chu an ngaihtuahho mek thu a sawi bawk.
Nationalist Congress Party (NCP) supremo Sharad Pawar pawhin Haryana chu “Aya Ram-Gaya Ram” politics a lar em em thin a ni a, mahse, tunah chuan Nitish Kumar-an a lehpel tawh a ti a. “Mipui ten vote an thlak hunah zirlai an zirtir dawn a ni” tiin Pawar chuan a sawi.
Communist Party of India general secretary D. Raja chuan Bihar a thil thleng chu BJP tena engti kawng pawha thuneihna chan an tumzia pholanna a ni a ti.
“|hendarhna an kalpui a, crores tel sengin leh central agency-te an hmang sual chungin BJP-te chuan INDIA alliance-ah hlauthhawnna an nei a ni. Mipui ten BJP rorelna dik lo an kham a, unemployment leh thil man sang an kham a ni. BJP-te hi zirlai an zirtir ang” tiin Raja chuan a sawi bawk.
Congress communications chief Jairam Ramesh pawhin Janata Dal (U) te chuan political colour thlakah laiking chu competition khauh tak a pe pha a ti bawk.
“Nitish Kumar aia political opportunist turu ka la hmu lo. Chuvang a nia, laiking pawh a elpha ang ka tihna a ni” tiin Ramesh chuan a sawi.
Delhi-a press conference a neihnaah Congress senior party thupuangtu Pawan Khera chuan Chief Minister tum kua nana lakluh a nih hnuah “Guinness World Records chu tun atang chuan Nitish book of world records” a ni tawh ang a ti bawk.
“Lok Sabha inthlana seat 400 lak theihna a awm tih chian avangin BJP te mangang chuan an kawngkhar an khar hnan ber tur chu an lalut mai a ni” tiin Khera chuan a sawi bawk.
Senior Congress leader Bhupesh Baghel pawhin, “Nitish Kumar an rintlakna a neih chitin chu a liam vek tawh” tiin a sawi bawk.
Trinamool Congress-te pawhin Nitish Kumar chu ‘political colour a thlak kual chhen’ avangin na taka demin mipui ten ‘opportunism’ chu an ngai thei dawn lo an ti bawk.
“Nitish Kumar hi a colour thlak kual reng avanga hriat lar a ni. INDIA group chhuahsana NDA a zawm hi a vanduaithlak a, hetiang politics a chanthat tumna reng hi chu mipui ten a phu tawk an pe ang” tiin Trinamool Congress MP Sougata Roy chuan a sawi.
“Trinamool-te chuan Nitish Kumar zuan kual dan hriain rinhlelhna a nei sa a. Mahse, Congress-te chuan thawhpui rintlakah an ngai tlat a ni” tiin a sawi bawk.
“Mipui ten engkim an hre vek a, mipui duhthlanna i politics hamthatna chauh ngaihtuaha i zah lo a nih chuan democracy-ah i phu tawk i hmu dawn” tiin Trinamool Minister Firhad Hakim chuan a sawi bawk.