Oscar a vote nei tura sawm thar zingah Ariana Grande, Sebastian Stan, Jason Momoa an tel

India atangin Kamal Haasan leh Ayushmann Khurrana te pawh an tel
Academy of Motion Picture Arts & Sciences-in kumina an pawl zawm thar, Oscar dawng tur thlannaah pawh vote nei thei turin mi 534 an sawm belh a, chung zingah chuan Ariana Grande, Mikey Madison, Brandi Carlile, Sebastian Stan, Jason Momoa, Andrew Watt, Conan O’Biren leh Jimmy Kimmel te pawh an tel a, Indian cinema lam pawhin hmelhriat a hlawh telh telh a, actor Kamal Haasan leh Ayusmann Khurrana te pawh sawmna dawng thar zingah an tel a, anni pahnih bakah Karan Mally (casting director), Ranabir Das (cinematographer), Maxima Basu (costume designer), Smriti Mundhra (documentary film siamtu) leh Payal Kapadia (film siamtu) te pawh an tel.
Kumina Academy a tel tura an sawm zinga 41% chu hmeichhia an ni a, 55% chu US pawnlam mi an ni. An sawm thar zingah hian Oscar nominee lo ni tawh 91 bakah Oscar dawng tawh 26 an tel a, Scientific leh Technical Award dawng tawh pathum an tel bawk.
An mi sawm te hian membership hi an pawm vek a nih chuan Academy of Motion Picture Arts & Sciences-ah hian member 11,120 an awm tawh dawn tihna a ni a, chung zingah 10,143 chu voting member an ni ang. Hei bakah hian academy-ah hian member zawng zawng zinga 35% chu hmeichhia an ni ang a, 21% chu US pawnlam mi an ni bawk ang.
Academy membership hi tawngpawng dil ve tawp theih a ni lo a, member ni lai branch/category khata awm dun mi pahnih takin an sponsor a ngai. Academy-ah hian branch 19 awmin, kumtin member tur hi uluk takin an la thar thin a, member lak thar turte chu an experience mai bakah an thawhhlawk dan leh khawvel huapa film community tana an pawimawhna te en thin a ni.