Pakistan-ah Sharif leh Bhutto sorkar

Nawaz Sharif leh Bilawal Bhutto party te chuan Pakistan-ah sorkar siam dun turin inremna an siam thei ta a.
Bhutto party PPP te chuan Sharif party PML-N tena karkalta inthlanna result chhuah hnuah prime minister an neih theihna turin an pui dawn ta a ni.
Party pahnih te hi kum 2022 pawh khan Imran Khan paihthla turin an lo thawk dun tawh bawk a.
Kumin Pakistan inthlanah independent candidate Pakistan tehreek-e-Insaf (PTI) thlawp te chuan beiseiloh takin vote hmu hnem berin seat an nei ngah ber a ni.
PPP leader Asif Ali Zardari chuan an party leh PML-N te chu inthlanah inbei nimahsela ram tana tha ber tur hispain an thawkdun dawn a ti a. “Chatuana kan inbeih kher a ngai lo” tiin Zardari chuan a sawi.
PML-N te pawhin thuchhuah siamin party pahnih te chuan politics ngelnghet a awm theih nan ke pen ho an duh tiin an sawi bawk a ni.
Pakistan inthlan result puanah independent te PTI te thlawp chuan seat 266 ah seat 93 an la a, Sharif party PML-N te chuan seat 73 an la a, Bhutto party PPP te chuan seat 54 an la thung a ni.
Hei bakah hian reserved seat awm 70 lai hmeichhia leh non-Muslim te tana dah chu party pahnih te hian an chang thei dawn bawk a, heng reserved seat te hi independent candidate te chuan an chang ve thei lo bawk.
PML-N official Marriyum Aurangzeb chuan party leader Sharif chuan a unaupa Shehbaz chu prime minister turin a rawt dawn a ti a, an pahnih hian prime minister lo ni tawh ve ve an ni bawk.
Bhutto chuan an party chuan PML-N mi leh sa prime minister an nih tir dawn a, an party chuan cabinet pawh an chuh dawn lo tiin a sawi bawk.
Imran Khan leh a party te chuan inthlan chu tihchingpen ni ngeia an ngaihthu sawiin inthlan result chu court a khin an tum thu an sawi thung a.
“Vote ruk hmanga sorkar siam lo turin ka ngen lawk a ni” tia sawiin Imran Khan chuan, “Chhun pachanga rukruk chu khua leh tui te zah lohna niin ram economy tihchhiat zui zelna tur a ni” tiin lung in atanga thuchhuah a siamah a sawi.