Pakistan leiba World Bank-in ngaimawh

Pakistan a retheihna chu tun fiscal chhungin 39.4% in a pung a, rethei bakberh mi maktaduai 12.5 vel an tlulut leh mek tiin World Bank chuan a sawi a. Sum lama harsatna namenlo tawk mek Pakistan chu nasa zawka hma la turin a ngen zui a ni.
Washington-a inbun sum puktirtu chuan Pakistan-in inthlanpui a hmachhawn hma ngeiin sorkar siam leh mai theite leh a kaihhnawih tinte bawhzui turin draft policy note a siam a ni.
World Bank chuan tun dinhmunah Pakistani maktaduai 95 vel chu rethei bakberhin an awm mek tiin a sawi bawk.
“Pakistan economic model chuan retheihna a tihniam tawh lo va, living standards chu ram dangte aiin a hniam mek a ni” tiin Tobias Hague, world bank-a thawk Pakistan buaipuitu chuan a sawi.
Global lender-te chuan Pakistan chu an ‘sacred cows’ – agriculture leh real estate tax tura tiin tul lova sum sen tihniama fiscal adjustment khauh zawka kalpui turin a ti bawk.
Hmalakna tur a sawi zingah tax-to-GDP ratio chu 5% a tisanga expenditure pawh GDP atanga 2.7% a tihniam turin a ti bawk.
Revenue-to- GDP ratio 5% a tisang tur hian tax exemption kalpui tihtawpa real estate leh agriculture sector-a tax phurritte tihniam turin a ti bawk.
“World Bank chuan Pakistan economy dinhmun a ngaihtuah takzet a ni” tiin Hague chuan a sawi bawk.
Pakistan chuan economic leh human development crisis nasa taka hmachhawn mek avangin policy nasa taka thlak danglam a ngai an ti bawk a.
“Tun hi Pakistan in policy a thlak danglamna hun remchang a ni” tiin Najy Benhassine, World Bank-a Pakistan ram director chuan a sawi.
Pakistan hian tax GDP atanga chhutin 22% a lakkhawm a ngai a, tunah a lakkhawm chin chu 10.2% chauh a ni a, a zahve vel lawihin an la hniam mek tiin World Bank chuan a sawi bawk.
World Bank chuan Pakistan chu tax exemption 2% a tihniam tur leh land leh property a tax lak 2% a tisang turin a ti bawk a, hei bakah hian agriculture sector-ah GDP atanga 1% tal revenue neih belh turin a ti bawk.
World Bank chuan transaction tih nan CNIC (Computerised National Identity Card) chu hman vek ni se a ti bawk.
Energy leh commodity subsidy tihniam tur leh single treasury account siam a, expenditure atanga 1% hum tura austerity measure kalpui turin a ti bawk.
Kum 2022 khan sorkarin commercial bank a deposit a neih chu Rs 2 trillion chuang niin sovereign borrowing a ngah avangin heta tanga 424 billion chu interest a pek ngai a ni, tiin World Bank chuan a sawi.
World Bank chuan sum hloha kal mek sorkar company-te laka federal development leh current expenditure tihhniam nghalin Rs 1.4 trillion hum theih a ni ang a ti bawk a. Chung atanga sum save awm thei chu GDP atanga 2.7% vel a ni dawn tiin a sawi bawk.
Higher Education Commission sum sen tihhniamin Rs 70 billion hum theih ti bawkin BISP (Benazir Income Support Programme) cost-sharing hmangin Rs 217 billion save theih a ni ang a ti bawk.
August thla khan Pakistan-ah inflation in 27.4% lawih a hawlh a, July thla khan International Monetary Fund chuan USD 1.2 billion a pe a ni.