Palian title chuh tur Rinchhana Wrestling thiamber district Aizawl

A duhthusam tipuitling thei turin Lalrinchhana Sailo chuan amah daltu hnuhnung ber Lalremtluanga a hneh a, Mizo Palian Inchai champion lai Lalsangliana nen an intawng dawn.
Zirtawpni zanah champion cho tur zawnna hmawrbawk a ni a, tah chuan North Vanlaiphai pa chak, kum 29 mi Rinchhana’n thawh thum an inchai chhungin 7-2-in hma a hruai. Thawh hnih dang la awm mah se Zobawk tlangval Remtluanga’n a dar a tihnat avangin a khel zawm thei ta lo a ni.
Tlaiah LPS Arena, Falkland-ah sub-junior, junior leh senior huanga greco-roman style leh freestyle wrestling hmanga inelna inter district zawh fel a ni ve thung a, championship thlengtu Aizawlin gold pakua, silver pariat, bronze pakua nen medal 26 an la a, a pumpuiah an sang ber.
Ningani a zawh ruala hmahruaitu Kolasib district-in gold pakua tho dawng mah se silver leh bronze panga ve ve lain medal 19 an thawkchhuak a, pahnihnaah tlahniamin championship an khar.
Pathumnaah ni hmasa ber Nilainia hmahruaitu Serchhip an awm a, gold pasarih leh silver paruk nen medal 20 an dawng.
A tawp lama hmasawn Saitualin gold pasarih tho lain silver pali leh bronze panga an hawn a; Lungleiin gold pahnih lain, Mamit leh Champhaiin pakhatna nihna an nei ve lo a ni.
Mizo inchai champion lai cho tur zawnna hmangin hun khar a ni ve thung.
Feet 5 inchi 11-a sang, kg 97-a rit Rinchhana’n a vawikhatna’n Palian title a chuh dawn a; kum 26 mi Remtluanga lakah thiamna nei leh tharum ngah a nihna a lantir.
Palaihawl title kawltu Remruatpuia (Saitual) nena innuai turin Ngursangzuala’n fiahna hnuhnung a paltlang hram a, Serchhip tlangval RB Lalthansanga nen thawh nga an inchai hnuah 2-1-in a chak.
Palaihawl title fight-ah Saitual inchai chak ve ve an intawng dawn a; Pate champion B. Lalawmpuia (Thenzawl) hmaa ding turin Saitual inchai chak tho Lalchhanhima a tling bawk a; amah ang bawka Pate champion ni tawh Bulfekzawl chhuantawlawl Lalawmpui a hneh a ni.
Thawh nga an inbeih chhungin 1-1-in an inhneh tawk a, inbanphawi hmangin an ching fel a; a vawikhatnaah chak zawk an awm lo a, a tum hnihnaah a tlang. A hmain title chuh tur zawnna semi-final lamah Chhanhima’n inbanphawi vawi hnihna hmangin Hmangaihzuala a hneh tawh bawk a ni.
Nulian champion Hmangaihsangi (Dilkhan) nena inchai turin Lunglei nula Zodinpuii’n chiang takin Lalsiamthari (East Lungdar) a hneh a, vawi hnih bawhbetin 21-1-in a chak.
Nute title chuh tur zawnnaah Kolasib nula Lalnuntluangi’n chungnung takin Veronica Lalbeiseii a hneh bawk. Vawi hnih a bawhbet bakah point 32 a thawkchhuak a, hliam vangin Tachhip nulain thawh lina a khel tluan thei lo a ni.
Nulaihawl title chuh turin Champhai inchai chak Peticost Lawmsangpuii chiah a inziaklut a, champion lai Elizabeth Rohlupuii (Melriat) hmachhawn thei turin a tling nghal a ni.