NBA regular season kal mek chu Paris khawpuiah game hnih khelh a ni a. Inkhel hmuhnawm takah Denver Nuggets chuan an khingpui Sacramento Kings an hneh. He inkhelah hian Nugget player pawimawh Nikola Jokic a khel tha viau a, a zawna a vawi nga nan triple-double a puitlin. Inkhel dangah LA Lakers chuan champion lai Boston Celtics an sawp ve bawk.
Denver Nugget leh Sacramento Kings ten inkhel hmuhnawm an lantir a, inkhel hmuhnawm takah hian khel tha tluang tak Nuggets in point 132-123 in hnehna an chang. Nuggets an chak theih nan vawi li ngawt Most Valuable Player lo ni tawh Nikola Jokic a khel tha leh pek hle. Kum 25 mi Jokic hian point 35 a thawkchhuak a, ball sawhlet vawi 22 zet a dawn tlin bakah vawi 17 zet assist a nei bawk a, a zawna a vawi nga nan triple-double a puitlin. NBA-ah triple-double a neih zawn rei ber niin Jokic hian mimal record duhawm tak a siam. A chet thatna inkhelah hian 66ft zeta sang atangin point thum a vawm lut nghe nghe a, hei hian pui tih a hlawh viau bawk.
Paris khawpuia inkhel dangah Los Angeles Lakers chuan champion lai Boston Celtics chu point 117-96 laiin an hneh. Celtics an hneh LA Lakers tana point thawkchhuak hnem ber Anthony Davis chuan point 24 a thawkchhuak a. An player ropui LeBron James chuan point 20 a thawkchhuak a, ball sawhlet vawi 14 a dawn bakah assist vawi ruk a nei tling bawk.
Paris khawpuiah NBA khelh a ni hian lawm a hlawh hle a. Basketballer ropui tak takte inkhel hi a hmunah footballer leh mi lar en an thahnem viau nghe nghe a ni. Inkhel entu zingah hian football a chawimawina ngaihhlut hlawh ber Ballon d’Or kawl mektu Rodri pawh a tel a. PSG player langsar Achraf Hakimi, Ousmane Dembele leh Presnel Kimpembete bakah Barcelona player pawimawh Pedri leh Ferran Torres te an tel.
Paris-ah Nikola Jokic a vul
Get real time updates directly on you device, subscribe now.
Prev Post
Next Post